Европ, Азийг холбосон төмөр замын "Умард коридор" төслийн талаар Монгол, ОХУ, БНХАУ гурван улсын хамтарсан олон улсын анхдугаар зөвлөгөөн боллоо. Анхдугаар зөвлөгөөнөөс гурван улсыг холбосон умард буюу Улаанбаатар төмөр замын транзит коридорыг хамтарч хөгжүүлэх замаар, дамжин өнгөрүүлэх тээврийн хэмжээг нэмэгдүүлэх тухай хамтарсан мэдэгдэл гаргаж, оролцогч талууд гарын үсэг зурсан байна. Төмөр замын умард коридорыг барьж байгуулахад хамгийн багадаа нэг тэрбум ам.долларын хөрөнгө шаардлагатай байгаа юм. Гурван тал гурвуулаа төмөр замын энэ төсөлд оролцох сонирхолтой байгаагаа илэрхийлээд байгаа ажээ. БНХАУ-ын талаас “Эрээн-Жинин” хэсгийн төмөр замын тээх хүчин чадлыг сайжруулах, ОХУ-ын талаас Наушки-Улаан-үд хэсгийн төмөр замын хүчин чадлыг нэмэгдүүлэх шаардлагатай байгаа гэдгээ илэрхийлсэн юм. Талууд Улаанбаатар төмөр замаар дамжин өнгөрөх тээврийг нэмэгдүүлэх арга хэмжээний төлөвлөгөөг 2014 оны эхний улиралд багтаан хамтран боловсруулж хэрэгжилтийг зохион байгуулахаар тохиролцлоо. Монгол-ОХУ-ын хувь нийлүүлсэн Улаанбаатар Төмөр замын шинэчлэлийн ажлын хүрээнд 400 сая ам.долларын хөрөнгө оруулалт шаардлагатай байна. Үүнээс 250 сая ам.долларыг Монгол, ОХУ-ын Засгийн газраас гаргаж, 125 сая ам.долларыг нь Улаанбаатар замын тээх хүчин чадлыг шинэчлэхэд зарцуулаад байгаа ажээ. 

Э.Нарантунгалаг 

Холбоо барих: narantungalag.e@bloombergtvmongolia.com 

minjma.g@bloombergtvmongolia.com