Дэлхийд алтны ханш буурах хандлагатай байгаа ч дэлхийн томоохон Төв банкууд алтны нөөцөө нэмэгдүүлэх бодлого баримталж байна.Олборлогдсон нийт алтны 18 хувийг эзэмшдэг Төв банкууд энэ жил 350 тонн алтыг 15 тэрбум ам.доллараар худалдан авна гэж Лондонд төвтэй Дэлхийн алтны зөвлөл үзэж байгаа аж. Төв банкууд 2012 онд нийт 535 тонн алт худалдаж авсан нь 1964 оноос хойшхи хамгийн өндөр үзүүлэлт болж байна. ОХУ алтныхаа нөөцийг 20 хувиар нэмэгдүүлснээрээ хамгийн том худалдан авагчид тооцогдож байгаа юм. Харин алтны ханш 2011 оны есдүгээр сард түүхэн дээд хэмжээндээ буюу 1921 ам.долларт хүрч байснаасаа хойш 31 хувиар унаад байна. Шинжээчид алтны ханшийн энэ жилийн өөрчлөлтийг таамаглахдаа "Уналттай зах зээл үргэлжилнэ" гэж үзжээ.“Goldman Sachs” банк жилийн хугацаанд алтны ханш 1100 ам.доллар хүртэл буурна гэж тооцоолж байгаа бол “Societe Generale” 2014 онд алтны ханш дунджаар 1125 ам.долларын ханштай байна гэж таамаглаж байна. Харин “Блумберг”-ийн шинжээчид алтны ханш дөрөвдүгээр улиралд дунджаар 1300 орчим ам.доллар байна гэж үзэж байгаа нь сүүлийн гурван жилийн хамгийн доод түвшин болж байгаа юм.

Б. Дуламхорлоо

Холбоо барих: dulamkhorloo.b@bloombergtvmongolia.com

minjma.g@bloombergtvmongolia.com