Монгол Улсын Засгийн газар хоёрдугаар сарын нэгнээс эхлэн тэтгэвэр, тэтгэмжийн хэмжээг дунджаар 15 хувиар буюу 10-30 хувиар нэмэгдүүлээд байна. Тэтгэврийг нэмэхдээ бүрэн тэтгэвэр авагчид болон ажилласан жил, тэтгэврийн даатгалын шимтгэлийг нөхөн тооцуулах тухай хуульд хамрагдсан иргэдийг ч оруулаад байгаа юм. Тэтгэврийн хэмжээг нэмэгдүүлэхдээ шатлалаар нь ялгавартай байдлаар тогтоожээ. Монгол Улсын хэмжээнд 2013 оны байдлаар 180-600 мянга хүртэлх төгрөгийн тэтгэвэр авдаг 319 мянга 31 иргэн байснаас 63.7 хувь нь сард 200 мянга хүртэлх төгрөгийн тэтгэвэр авдаг байна. Үлдсэн нь буюу 34.8 хувь нь 201-600 хүртэлх мянган төгрөг, 1.5 хувь нь 600 мянган төгрөгөөс дээш тэтгэвэр авдаг байсан ажээ. Тэтгэвэр тэтгэмжийн хэмжээг нэмэгдүүлсэний дараа хамгийн бага шатлалын тэтгэвэр авдаг буюу нийт тэтгэвэр авагчдын 63.7 хувийнх нь тэтгэвэр дунджаар 15.4 хувиар, дунд хэмжээний тэтгэвэр авагчдынх 7.2 хувиар, өндөр тэтгэвэр авагчдынх дунджаар 2.8 хувиар нэмэгдсэн тухай Хүн амын хөгжил, нийгмийн хамгааллын сайд С.Эрдэнэ мэдээллээ. Энэхүү тооцооллыг гаргахдаа өнгөрсөн оны 11 дүгээр сарын байдлаарх инфляцийн түвшнийг харгалзан тогтоосон байна. Ингэснээр тэтгэврийн доод хэмжээ 180 мянга 300 төгрөг байсныг 15 хувиар нэмэгдүүлж 207 мянга 300 төгрөг болгосон бол хувь тэнцүүлсэн тэтгэврийн доод хэмжээ 145 мянга 200 төгрөг байсныг 18.6 хувиар нэмэгдүүлсэн тухай Хүн амын хөгжил, нийгмийн хамгааллын сайд С.Эрдэнэ онцоллоо. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com