11 дүгээр сарын байдлаар орон сууцны үнийн ерөнхий индекс 1.309 нэгж хүрч, өмнөх сараас 7.5 хувиар буурлаа. Үүнд шинэ болон хуучин орон сууцны индекс өмнөх сараасаа эрс буурсан нь нөлөөлжээ.

Тухайлбал: шинэ болон хуучин орон сууцны үнийн индекс 7-11 хувиар буурсан байна. Хэдий тийм боловч урт хугацаанд нь харвал ерөнхий индекс өмнөх оны мөн үеэс 11 хувиар өссөнийг “Тэнхлэг зууч” мэдээллээ.

Нийслэлд захиалга авч буй шинэ орон сууцны дундаж үнэ тайлант сард 2.77 сая төгрөг хүрч бага зэрэг өссөн байна. Харин өмнөх оны мөн үетэй харьцуулбал 10.5 хувиар өсжээ.

Баянзүрх дүүргийн стандарт зэрэглэлийн орон сууцны үнийн өөрчлөлт дундаж үнэд багагүй нөлөөлснийг “Тэнхлэг зууч” онцолж байна. Баянзүрх дүүрэгт шинэ орон сууцны дундаж үнэ 2.61 сая төгрөг хүрч, өмнөх сараас 3.3 хувиар өссөн нь бусад дүүрэгтэй харьцуулахад хамгийн өндөр өсөлт болжээ.

Харин Сүхбаатар болон Чингэлтэй дүүрэгт орон сууцны дундаж үнэ гурван хувиар буурсан үзүүлэлттэй байгаа аж.

Бизнес зэрэглэлийн шинэ орон сууцны дундаж үнэ нэг метр квадрат нь 4.31 сая төгрөг байна. Энэ нь өмнөх оны мөн үеэс 16.8 хувиар өссөн үзүүлэлт боллоо. Харин өндөр зэрэглэлийн орон сууцны дундаж үнэ 7.5 сая төгрөг хүрч, өмнөх сараас бага зэрэг буурчээ.

Э.Одончимэг

Холбоо барих: odonchimeg.e@bloombergtvmongolia.com

minjma.g@bloombergtvmongolia.com