Туркийн Ерөнхий сайд Тайип Эрдоганы ойрын хүрээний хүмүүс авлигын хэрэгт холбогдож, огцрох өргөдлөө өгсний дараахан тэрбээр Засгийн газрын 10 сайдыг хооронд нь сэлгэж, томиллоо. Тухайлбал, Европын холбооны асуудал эрхэлсэн сайдаар Эгемен Баж, Аж үйлдвэрийн сайдаар Фикри Ишик, Эдийн засгийн сайдаар Нихат Зейбеки нарыг томилжээ. Лхагва гарагт Туркийн Эдийн засгийн сайд, Дотоод хэргийн сайд, Байгаль орчин, хотын хөгжлийн сайд нар огцорсон байна. Тэдний дунд Тайип Эрдогантай 20 орчим жил хамтран ажилласан тус улсын Байгаль орчин, хотын хөгжлийн сайд асан Эрдоган Байрактар багтсан нь олны анхаарлыг хамгийн их татаж байна. Эрдоган Байрактарын хүүг цагдаа нар авлигын хэрэгт холбогдуулан баривчлаад байгаа юм. Түүнээс гадна тэрбээр Ерөнхий сайдыг өөрөө огцрохыг шаарджээ. Ерөнхий сайд Тайип Эрдоган Туркийн Ерөнхийлөгч Абдулла Гюльтай лхагва гарагт удаан ярилцсаны эцэст 10 сайдыг шинээр томилохоор болсон байна. Энэ нь кабинетийн нийт гишүүдын тал хувь нь ажээ. Хууль цагдаагийн байгууллагынхан сайд нарыг Иран руу хууль бусаар мөнгө шилжүүлсэн, бүтээн байгуулалтын томоохон төслүүдийг хэрэгжүүлэхдээ авлига авсан хэмээн буруутган шалгаж байгаа юм. Хэдий тийм боловч огцорсон сайд нар өөрсдийгөө буруугүй гэж үзэж байна. Үүнтэй зэрэгцээд тус улсын нийслэл Истанбул хотноо Засгийн газрын сайд нар авлигын хэрэгт холбогдож байгааг эсэргүүцсэн иргэдийн жагсаал боллоо. Түүнчлэн Туркийн улс төрд үүсээд буй энэхүү эмх замбараагүй байдал нь санхүүгийн зах зээлд ч нөлөөлж эхэлжээ. Тус улсын хувьцааны зах зээлийн индекс лхагва гарагт 4.2 хувиар буурч, сүүлийн дөрвөн сарын хугацаан дахь хамгийн бага түвшинд хүрээд байна. Мөн Туркийн мөнгөн тэмдэгт лирийн ам.доллартай харьцах ханш 0.5 хувиар буурчээ. 

Т.Элиса

Холбоо барих: elisa.t@bloombergtvmongolia.com

minjma.g@bloombergtvmongolia.com