Хөдөө аж ахуйн биржийн гишүүн брокерийн компаниудын төлөөлөгчид Япон улсын Токиогийн таваарын бирж “Тосом”-ын үйл ажиллагаа болон төрөл, зохион байгуулалт, таваарын фьючерсийн гэрээний арилжаатай танилцжээ. “Tokyo commodity exchange” буюу “Тocom” нь Японы эдийн засгийн бодлогыг хэрэгжүүлэгч хөдөлгүүрийн нэг гэдгээрээ онцлогтой. Тус биржийг иенийн ам.доллартай харьцах ханш 100 орчим байгаа энэ үед Хятад болон Энэтхэгийн хөрөнгө оруулагчдыг татах дэлхийн томоохон түүхий эдийн бирж гэж салбарынхан тодорхойлж байна. Биржийн арилжааны идэвхийг харуулдаг гүйлгээний хэмжээ энэ оны эхний найман сарын байдлаар 22 хувиар өссөн аж. Харин гадаадын хөрөнгө оруулагчдын хийсэн гүйлгээ 41 хувийг бүрдүүлсэн ба энэ нь “Тоcom” биржийн түүхэн дэх хамгийн дээд хэмжээнд тооцогджээ. Шинжээчид тус үзүүлэлтийг Ерөнхий сайд Шинзо Абэгийн удирдлага дор Японы төв банкнаас хэрэгжүүлсэн эдийн засгийг сэргээх багц арга хэмжээний үр дүн гэж тодорхойлсон. Тодруулбал “Тосом” биржийн зүгээс гадаадын хөрөнгө оруулагчдад нээлттэй болохын тулд дөрвөн жилийн өмнөөс арилжааны платформ “Nasdaq OMX Group”-ийг нэвтрүүлсэн төдийгүй арилжааны цагийг уртасгаж, санхүүгийн шинэ хэрэгслийн арилжааг зөвшөөрчээ. Үүний үр дүнд гадаадын хөрөнгө оруулагчдын арилжааны хэмжээ арван хувиар өссөн аж. Түүнчлэн “Тocom” бирж дээр Японы түүхий эдийн зах зээлийн гүйлгээний 99 хувь нь арилжигддаг юм байна.

М.Дэлгэрмаа

Холбоо барих: Delgermaa.m@bloombergtvmongolia.com

Tsatsralt.b@bloombergtvmongolia.com