Сөрөг хүчнийхэн Украйн улс ОХУ-аас улам илүү хараат болно гэж үзэж байна
Украйны сөрөг хүчнийхэн тус улсын Ерөнхийлөгч Виктор Януковичийг эсэргүүцсэн жагсаалаа үргэлжлүүлэхээр боллоо. ОХУ-ын Ерөнхийлөгч Владимир Путин Украйны Засгийн газрын 15 тэрбум ам.долларын бондыг худалдаж авахаар болсон бөгөөд үүний ачаар Украйн улс эдийн засгийн дампуурлаас сэргийлж чадна гэж Украйны Ерөнхий сайд Микола Азаров мэдэгдсэн байна. Гэвч сөрөг хүчнийхэн Украйн улс энэхүү санхүүгийн дэмжлэгт хэрхэн хариу барихаар болсныг мэдэхийг шаардаж байгаа ажээ. Украйны эдийн засаг ОХУ-ын байгалийн хийн нийлүүлэлтээс ихээхэн хамаардаг. Түүнчлэн Украйны үйлдвэрлэлийн экспортын 75 хувь нь ОХУ руу гардаг. Харин энэ удаагийн санхүүгийн дэмжлэгээс болж Украйн улс ОХУ-аас улам илүү хараат болно гэж сөрөг хүчнийхэн дүгнэжээ. Украйны Засгийн газрыг эсэргүүцэн жагсагчид Киев хотын төв Тусгаар тогтнолын талбайг чөлөөлөх бодолгүй байгаагаа илэрхийлсэн байна. ОХУ-ын хувьд дээрх санхүүгийн дэмжлэгээс гадна Украйнд нийлүүлэх байгалийн хийн үнийг гуравны нэгээр бууруулахаар болсон байна. Түүнчлэн В.Путин, В.Янукович нарын уулзалтын үеэр Украйн улсыг Гаалийн татварын холбоонд нэгтгэх талаар ярилцаагүй гэж мэдээлсэн юм.
Т.Элиса
Холбоо барих: elisa.t@bloombergtvmongolia.com
minjma.g@bloombergtvmongolia.com