АНУ-ын Ерөнхийлөгч Дональд Трамп Давост болж буй Дэлхийн эдийн засгийн чуулганыг хааж үг хэлнэ. Тэрбээр ямар мэдэгдэл хийх вэ гэдэг нь олон улсын ажиглагчдын анхаарлыг татаж байгаа юм. Ажиглагчдын харж байгаагаар Дональд Трамп “АНУ бизнес эрхлэгчдэд нээлттэй бодлого баримтална” гэдгийг албан ёсоор зарлаж магадгүй байна. Хэдий тийм боловч Дональд Трамп протекционист бодлого баримталж байгаа нь чөлөөт худалдааг дэмждэг улс төрийн болон бизнесийн салбарын тэргүүлэгчидтэй зөрчилдөж байгаа юм. Мөн тэрбээр АНУ-ын эдийн засгийн өсөлт, татварын шинэчлэлээ онцлохын зэрэгцээ худалдааны асуудлыг шүүмжилж магадгүй гэж олон улсын ажиглагчид үзэж байна. АНУ саяхан импортын зарим бараа, бүтээгдэхүүнд татвар ногдуулахаар шийдвэрлэсэн нь шүүмжлэлийг илүү нэмэгдүүлээд байгаа юм. АНУ-ын Сангийн сайд Стивен Мнучин Давосын чуулганд хэлсэн үгэндээ “Чөлөөт худалдааг дэмжинэ” гэдгээ онцолсон байна. Үүнээс гадна "АНУ-ыг тэргүүнд тавина" гэсэн бодлого дэлхий дахиныг бүхэлд хамарна гэдгийг тайлбарлажээ. Түүнчлэн АНУ-ын Сангийн сайд “Ам.долларын ханш сулрах нь эдийн засагт эерэг нөлөөтэй” гэдгийг Давосын чуулганы үеэр дурдсан юм. Мөн АНУ-ын Худалдааны сайд Уилбур Росс "Татвар ногдуулах асуудалд бусад орнууд таагүй хандаж байгаа нь тохиромжгүй зүйл" гэж байр сууриа илэрхийлсэн байна.

Б.Ариунболд

Холбоо барих: ariunbold.b@bloombergtvmongolia.com

minjma.g@bloombergtvmongolia.com