Японы Олон улсын хамтын ажиллагааны банкны баталгаатайгаар тус улсын зах зээлээс хөрөнгө босгох “Самурай” бондыг 12 дугаар сард гаргах боломжтой болохыг Японы талаас баталгаажуулсан. Түүнчлэн Монгол Улсын Хөгжлийн банкнаас гаргах энэхүү бондод Японы Олон улсын хамтын ажиллагааны банк баталгаа гаргаж буй нь хүүгийн түвшин бага байхад голлох нөлөөг үзүүлэх ажээ. Энэ талаар “MIBG” компанийн гүйцэтгэх захирал А.Билгүүн “Миний ойлгосноор бондын жил бүрийн төлбөр буюу купонд баталгаа гаргаж өгч байгаа юм билээ. Жил бүрийн төлбөрийн 90 хувьд нь баталгаа гаргаж өгч байна гэсэн үг. Өөрөөр хэлбэл Монголын зээлжих эрхэд Японы засгийн газраас шууд хөнгөлөлттэй зээл өгч байна уу гэж харагдаж байна. Ингэснээр хүүгийн түвшин баталгаатай байхад нөлөө үзүүлнэ” гэж ярьсан. Түүнчлэн тэрбээр “Самурай бондын хувьд хамгийн эрсдэлтэй зүйл бол иен. Учир нь Японы Төвбанкнаас мөнгөний зөөлөн бодлого барьж, өнгөрсөн нэг жилийн хугацаанд иен 25 хувиар унасан. Үүнийг барьж чадах уу, үгүй юу гэдэг бол валютын эрсдэл. Өөрөөр хэлбэл иен өсөөд эхэлбэл “Самурай” бондоор хүлээх хариуцлага өндөрсөнө” хэмээн онцолсон. Харин Монгол Улсын Хөгжлийн банкны гүйцэтгэх захирал Н.Мөнхбат өмнө нь Блумбергт өгсөн ярилцлагадаа “Самурай бондын зах зээл дээр өөрийнх нь тогтсон жаяг гэж бий. Өөрөөр хэлбэл дотоодын хөрөнгө оруулагчид нь тухайн хөгжиж буй улсын эрсдлийг үүрдэггүй. Энэ хөрөнгө оруулалтыг Японы Засгийн газрын зүгээс дэмжихийн тулд, тус улсын олон улсын хамтын ажиллагааны банкнаас буюу 100 хувь Засгийн газрын өмчит төрийн банкнаас баталгаа гаргаж өгдөг. Өөрөөр хэлбэл хөрөнгө оруулагчдад очих эрсдлийг банк тодорхой хэмжээгээр хуваалцаж байна гэсэн үг” хэмээсэн юм. 

Б.Цацралт 

Холбоо барих: Tsatsralt.b@bloombergtvmongolia.com