ОХУ-ын рублийн ханш 2020 оны гуравдугаар сараас хойш байгаагүй сул түвшиндээ ойртож байна. Хамгийн сүүлийн хөдөлгөөнийг харвал рублийн ханш ам.долларын эсрэг 1.5 хувиар суларч, хоёр валютын хослол 80.95 болоод байгаа юм.

Шинжээчдийн үзэж байгаагаар АНУ-ын Ерөнхийлөгчийн сонгуульд Жо Байден ялбал рублийн ханш хөгжиж буй орнуудын валютууд дундаа хамгийн тааруу үзүүлэлттэй валютын нэгт тооцогдох юм байна. Одоогоор энэ үзүүлэлтийг турк лира толгой цохиж байгаа аж.

Хөл хорионы дэглэмтэй холбоотойгоор Европын орнуудын эдийн засгийн өсөлт саарах эрсдэлтэй гэж хөрөнгө оруулагчид харж байна. Үүнтэй холбоотойгоор гол валютууд ч суларлаа. Фунт-стерлинг ханш ам.долларын эсрэг 0.7 хувиар суларч, хоёр валютын хослол 1.2855 болсон нь сүүлийн дөрвөн долоо хоногт байгаагүй бага үзүүлэлт юм.

“Коронавирус”-ийн халдвар хурдацтай тархаж, Европт хоёр дахь давлагаа эхэлж байгаатай холбоотойгоор Их Британийн Ерөнхий сайд Борис Жонсон нэг сарын хугацаанд хязгаарлалт тогтоохоор болсон нь ийнхүү эдийн засагт нь нөлөөлж байгаа гэж хэлж болохоор байна.

Пүрэв гарагт Английн Төв банк мөнгөний бодлогын шийдвэрээ танилцуулна. Энэ нь тус улсын хөл хорио тогтоож эхлэх өдөртэй давхцаж байгаа юм.

Б.Дөлгөөнзул

Холбоо барих: dulguunzul.b@bloombergtvmongolia.com

minjma.g@bloombergtvmongolia.com