Оюу Толгойн бүтээгдэхүүнийг экспортод гаргах асуудал нааштайгаар шийдэгдэж байгаа бөгөөд өнөөдрийн байдлаар тус ордод 40 мянган тонн баяжмал экспортод гарахад бэлэн болоод байгаа гэж “Rio Tinto” групп мэдээлж байна. Оюу Толгойн экспорт хойшлохын хэрээр Монгол Улсын төсвийн орлогын төсөөлөл хүндхэн байдалд орох эрсдэлтэй нүүр тулаад байгаа. Учир нь Олон улсын валютын сангийн мэргэжилтнүүдийн тооцоолсноор төсвийн орлогын тасалдал дотоодын нийт бүтээгдэхүүний зургаан хувьд хүрч болзошгүй байгаа юм. Тодруулбал, 2013 оны төсвийн орлогыг 28.9 хувиар өсөхөөр тооцоолсны 24 хувийг зөвхөн уул уурхайн экспортын бүтээгдэхүүний орлогоос бүрдүүлж байгаа. Тэр дундаа Оюу Толгойн ордоос 1.1 сая тонн зэсийн баяжмал экспортолно гэсэн тооцоог Сангийн яамнаас 2013 оны төсвийн төсөөлөлд тусгасан. Ингэхдээ энэ онд зэс, алтны экспортоос нийтдээ 579.4 тэрбум төгрөгийн орлого орж ирэхээр төсвийн төсөөлөлд тусгаснаас гадна Оюу Толгойгоос олох нэмэлт орлогыг 445.8 тэрбум төгрөг гэж тооцжээ. Харин Оюу Толгой компанийн баяжуулах үйлдвэрийн инженерийн мэдээллээр бол нэг тонн баяжмалыг өнөөгийн ханшаар тооцож гаргавал өдөрт 2.6 сая ам.доллар, сардаа 78 сая, долдугаар сараас энэ оны эцэс хүртэл нийт 390 сая ам.долларын баяжмал гаргах боломжтой байна.

Э.Нарантунгалаг

Холбоо барих: Narantungalag.e@bloombergtvmongolia.com

Munkhjin.ts@bloombergtvmongolia.com