Нийслэлийн Засаг дарга төр, хувийн хэвшлийн хамтын ажиллагааг нэмэгдүүлж, хотынхоо хөгжилд хувь нэмрээ оруулахыг нийслэлд үйл ажиллагаа явуулж буй аж ахуйн нэгжүүдэд уриалсан. Энэ хүрээнд “Оюу толгой” компани Монгол Улсын Боловсролын Их сургуулийн уулзвараас Спортын төв ордны баруун хойд уулзвар хүртэлх буюу “Оюутны гудамж”-ийг тохижуулж, өнөөдөр албан ёсоор нээлээ. Явган хүний зам, ногоон байгууламж болон бусад тохижилтыг иж бүрнээр нь шинэчлэхэд, 500 орчим сая төгрөг зарцуулсан байна Тодруулбал нийт 310 метр гудамжинд Монгол улсын “Төрийн дуулал”-д зориулсан хөшөө, уран баримал, явган хүний зам, модны гэрлэн чимэглэл болон бусад төрлийн тохижилтын ажлыг хийжээ. Түүнчлэн нээлтийн үеэр Нийслэлийн Засаг дарга Э.Бат-Үүл “Энэ гудамжинд зөвхөн оюутан, залуус төдийгүй нийслэлийн иргэд зугаалж, Wi-Fi төхөөрөмжийг ашиглах боломжтой боллоо. Нийгмийн хариуцлагаа ухамсарлан, хамтран ажиллаж байгаа та бүхэнд талархал илэрхийлье” хэмээн онцолсон.

Холбоо барих: Tsatsralt.b@bloombergtvmongolia.com