ОХУ-ын инфляци 11 дүгээр сард өнгөрсөн оны мөн үетэй харьцуулахад 6.5 хувиар өссөн талаар Холбооны статистикийн газраас мэдээллээ. Харин өнгөрсөн аравдугаар сард 6.3 хувиар өссөн үзүүлэлттэй гарч байжээ. ОХУ-ын Засгийн газар болон тус улсын Төв банк инфляциа 15 сарын хугацаанд 5-6 хувьд барихаар зорьж байсан юм. Гэвч ОХУ-ын эрх баригчид энэхүү зорилтдоо хүрч чадсангүй. “Блумберг”-ийн шинжээчид ОХУ-ын инфляцийг 6.4 хувиар өснө гэж таамаглаж байсан ч энэ удаагийн үзүүлэлт шинжээчдийн таамгаас өндөр гарлаа. Харин ОХУ-ын Төв банкны тэргүүн Элвира Набиуллина эдийн засгаа тэлэх зорилгоор бодлогын хүүгээ бага хэвээр үлдээх бололтой. Инфляци ийнхүү хурдацтай өсч байгаа нь тус улсын Төв банк мөнгөний бодлогоо тэлж байгаатай холбоотой гэж шинжээчид таамаглаж байна. ОХУ-ын Эдийн засгийн яам 2013 оны эцэс гэхэд тус улсын инфляци 6.2 хувьд хүрнэ гэж таамаглаж байгаа юм. ОХУ-ын инфляцийн өсөлтөд хүнсний бүтээгдэхүүний үнэ хамгийн их нөлөөлсөн бөгөөд зөвхөн өндөгний үнэ гэхэд 11 дүгээр сард 39.2 хувиар өссөн байна. Харин хүнсний ногооны үнэ өнгөрсөн оны мөн үетэй харьцуулахад 8.9 хувиар өсчээ. 

Т.Элиса 

Холбоо барих: elisa.t@bloombergtvmongolia.com 

minjma.g@bloombergtvmongolia.com