Өнгөрсөн есдүгээр сарын эцсийн байдлаар 42 мянга 968 иргэнд 1.6 их наяд төгрөгийн орон сууцны зээлийг арилжааны банкууд олгоод байна. Энэ дүн нь өмнөх сараас 14.3 хувиар өссөн үзүүлэлт болж байгаа төдийгүй оны эхнээс 76 хувиар өсч сүүлийн зургаан жилийнхээ дээд түвшинтэй ойролцоо болжээ. Энэхүү өсөлтийг зургадугаар сараас хэрэгжиж эхэлсэн жилийн найман хувийн хүүтэй орон сууцны зээлийн эх үүсвэр бүрдүүлжээ. Өнгөрсөн онуудад орон сууцны зээлийн жилийн өсөлт нь хамгийн ихдээ 50 хувьд хүрч байсан бол 2008-2009 оны эдийн засгийн хүндрэлийн үед жилийн өсөлт нь дөнгөж 3.6 хувьтай байсан байна. Нийт зээлийн 667.4 тэрбум төгрөг буюу 41.4 хувь нь арилжааны банкууд өөрийн эх үүсвэрээс олгосон бол жилийн зургаан хувийн хүүтэй зээл, 30.7 хувийг найман хувийн хүүтэй Орон сууцны хөтөлбөрийн зээл бүрдүүлж байхад 27.9 хувь нь найман хувьд шилжүүлсэн зээл байгаа ажээ. Орон сууцны нийт зээлийн 95.8 хувийг төгрөгөөр, 4.2 хувь гадаад валютаар олгосон байна. Нийт зээлийн үлдэгдэл өсч байгаатай холбоотойгоор түүнд эзлэх хугацаа хэтэрсэн болон чанаргүй зээлийн хувь тогтмол буурсан хандлагаа хадгалж байна. Есдүгээр сарын эцсийн байдлаар нийт зээлийн үлдэгдлийн 0.2 хувь нь чанаргүй зээл, 0.2 хувь нь хугацаа хэтэрсэн зээл байжээ. Өнгөрсөн оны есдүгээр сард нийт зээлд эзлэх чанаргүй зээлийн хувь 0.7 байсан юм. Харин есдүгээр сарын эцсийн байдлаар жигнэсэн дундаж хүү 9.1 хувь болж өмнөх сараас 0.2 хувиар өссөн байна. Гэхдээ энэ нь жилийн найман хувийн хүүтэй орон сууцны зээлийн хөтөлбөр хэрэгжихээс өмнөх үетэй харьцуулахад 7.5 нэгж хувиар буурчээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com