Олон улсын валютын сан ОХУ-ын 2014 оны эдийн засгийн өсөлтийн төлвийг буурууллаа. Хэрэглээний үнийн индекс тус улсын Төв банкнаас тавьсан зургаан хувийн зорилтыг давж өсөх тооцоотой байгаа учраас ирэх жил хойд хөршийн эдийн засаг өмнөх тооцооноос нэг хувиар удаан буюу хоёр хувиар өснө гэж Олон улсын валютын сан үзсэн байна. Харин 2013 оны эцэст тус улсын эдийн засаг 1.5 хувиар өсөх төлөвтэй байгаа аж. ОХУ-ыг хариуцсан мэргэжилтэн Антонио Спилимбергогийн тайлбарлаж байгаагаар, энэ удаагийн шийдвэрийг болзошгүй эрсдлүүдийг харгалзаж үзсэний үндсэн дээр гаргажээ. Тухайлбал, гадаад санхүүгийн орчин, олон улсын газрын тосны ханшийн хэлбэлзлээс хамааралтай байдал, эрсдэлтэй зээлийн өсөлт болон бизнесийн орчны шинэчлэлтэй холбоотой эргэлзээтэй байдал зэргийг харгалзан үзсэн байна. Олон улсын валютын сангийн үзэж байгаагаар 2014 онд хоёр хувийн таамагт хүрч өсөхийн тулд ОХУ-ын Засгийн газраас эдийн засгийг дэмжих арга хэмжээ хэрэгжүүлэхээсээ илүүтэйгээр компанийн засаглалын бий болгох, шаардлагатай дэд бүтцийг байгуулж, экспортыг дэмжихэд анхаарах ёстой гэж тайланд тусгажээ. Өнгөрсөн сард ОХУ-ын Эдийн засгийн яамнаас 2013 болон 2014 оны эдийн засгийн өсөлтийн төлвөө харгалзан 1.5, 2.5 хувь болгож бууруулаад байсан юм. ОХУ-ын Ерөнхийлөгч Владимир Путин төрийн оролцоотой компаниудын ханшийг нам дор түвшинд барих замаар Төв банкны инфляцийн зорилтыг биелүүлж, эдийн засгийн өсөлтийг сэргээхэд анхаарч байна. Мөн ирэх жил 14 их наяд рублийн хэмжээтэй төсвийн зарлагыг үр ашигтай зарцуулахад анхаарч байгаа юм. 

Б.Дуламхорлоо

Холбоо барих: dulamkhorloo.b@bloombergtvmongolia.com 

minjma.g@bloombergtvmongolia.com