Сүүлийн хэдэн жилийн хугацаанд Монгол Улсад шилжих хөдөлгөөний урвуу урсгал шинээр ажиглагдаж байгааг НҮБ-ын тайланд дурдсан байна.

Шилжих хөдөлгөөний урвуу урсгал нь 2020 онд цар тахлын хямралыг даван туулах арга стратеги хэлбэрээр илэрч байгаа юм.

НҮБ-ын танилцуулсан “Монгол Улсын хөгжлийн төлөв байдлын шинжилгээ 2021” тайланг харвал урвуу шилжилт хөдөлгөөнд оролцож буй шилжин суурьшигчдын дийлэнх нь эдийн засгийн идэвхтэй хүмүүс байна.

Тэдний 35 орчим хувь нь бакалаврын зэрэгтэй, 57 гаруй хувь нь гэр бүлтэй, ихэвчлэн хөдөлмөр эрхэлдэг хүмүүс байгаа юм.

Мөн шилжин суурьшигчдын дийлэнх нь гаргасан шийдвэртээ сэтгэл хангалуун байгааг Олон улсын шилжилт хөдөлгөөний байгууллагын танилцуулсан судалгаанд дурджээ.

2020 онд л гэхэд Улаанбаатар хотоос Төв, Орхон, Сэлэнгэ, Дархан-Уул, Хэнтий, Өвөрхангай, Дорноговь зэрэг аймаг руу нийт 43 мянга 478 хүн шилжин суурьшсаныг Үндэсний статистикийн хороо мэдээллээ.

Үүнээс гадна нийслэл хотын захиргаа цөөн тооны өндөр ур чадвартай ажиллах хүчийг хот руу шилжиж ирэхийг дэмжсэн шилжилт хөдөлгөөний хаалттай бодлого баримталж байна. Энэ нь иргэний болон улс төрийн эрхийн тухай олон улсын фактыг зөрчиж байгааг тайланд дурджээ.

Ингэснээр хөдөө орон нутгаас нийслэл хотод шилжиж ирсэн албан ёсны бүртгэлтэй хүмүүсийн тоо 2017 онд 25 мянга байсан бол 2019 онд энэ тоо 6800 болж буурахад нөлөөлсөн байна.

Хэдий тийм боловч хүн амын бодит шилжилт хөдөлгөөнийг хорьж чадаагүйгээс нүүж ирсээр байгаа ядуу өрхүүдийн иргэний бүртгэлд бүртгүүлэх боломж хязгаарлагдаж байна. Мөн улмаар тэдний боловсрол, эрүүл мэндийн суурь үйлчилгээ авах, газар өмчлөх эрх зөрчигдөхөд хүргэжээ.

Энэ нь тэр дундаа бага насны хүүхэд болон өсвөр насныханд ноцтой эрсдэл учруулж байгааг онцолж байна.

Г.Хулан | @KhulanGanzorig

Холбоо барих: khulan.g@bloombergtvmongolia.com

minjma.g@bloombergtvmongolia.com