Ерөнхийлөгчийн сонгуульд нэр дэвшигчдийн мөрийн хөтөлбөрт эдийн засагтай холбоотой хэд хэдэн заалт орсон байна.

Монгол Ардын намаас нэр дэвшигч У.Хүрэлсүх "Баялагтаа эзэн Монгол" уриатайгаар сонгуульд нэр дэвшиж байна. Энэ хүрээнд уул уурхайн салбарын ашгийг ард түмэнд тэгш хуваарилах санаачилгыг мөрийн хөтөлбөртөө тусгажээ. Ингэхдээ баялгийн болон хуримтлалын нэгдсэн сангаар дамжуулах юм байна.

Засгийн газар “Оюу Толгой” ХХК-ийн болон “Эрдэнэт үйлдвэр” ТӨҮГ-ын татварын орлогыг шууд бусаар нийтэд хүртээх арга хэмжээг өмнө нь авсан юм. Мөрийн хөтөлбөрөөс Дубайн гэрээг хүчингүй болгох саналыг мөн онцолж болохоор байна.

Харин Ардчилсан намаас нэр дэвшигч С.Эрдэнэ ашигт малтмалын салбарын үр нөлөөтэй, ашигтай байдлыг нэмэгдүүлэхэд анхаарахаа тусгаад байна. Мөн Төрийн өмчит аж ахуйн нэгжүүдийг хувьчлах хуулийг санаачилна гээд, тэр дундаа “Эрдэнэт”, “Оюутолгой” зэрэг томоохон төсөл эрхэлж буй аж ахуйн нэгжүүдийн 10-аас доошгүй хувийг иргэдэд хувьчилна гэжээ. Мөн цаашид хөрөнгө оруулалт татах, ядуурлыг бууруулах, ажлын байр нэмэгдүүлэх чиглэлийг бүх талаар дэмжинэ гэсэн байна.

"Зөв хүн - Электорат" эвслээс нэр дэвшигч Д.Энхбат эдийн засгийн гол секторуудад шинэ үеийн технологийг голчлон нэвтрүүлэх, байгальд ээлтэй бизнес эрхлэлтийг нэмэгдүүлэх санаачилгаа мөрийн хөтөлбөртөө тусгажээ. Шинэ үеийн технологид блокчэйн, хиймэл оюун, аж үйлдвэрийн дөрөвдүгээр хувьсгалын технологийн шийдлүүд байх юм байна. Мөн цар тахлын үеийн дараах эдийн засгийг сэргээх чиглэлд анхаарахаа илэрхийллээ.

Ж.Зоригт | @TeraReader

Холбоо барих: zorigt.j@bloombergtvmongolia.com

minjma.g@bloombergtvmongolia.com