Монголбанк даваа гарагийн арилжаагаар нэг долоо хоногтой 373.5 тэрбум төгрөгийн Төв банкны үнэт цаасыг 10.5 хувийн жигнэсэн дундаж хүүтэйгээр арилжааллаа. 2014 оны хоёрдугаар сарын 17-ны байдлаар нэг долоо хоногтой Төв банкны үнэт цаасны үлдэгдэл 1118.4 тэрбум төгрөг болжээ. Нэг долоо хоногийн хугацаатай Төв банкны үнэт цаас нь банкуудын нөөцийг удирдахад чухал үүрэг гүйцэтгэх бөгөөд Монголбанкны мөнгөний бодлогын үндсэн хэрэгсэл болдог байна. Түүнчлэн Монголбанк өнөөдөр дөрвөн долоо хоногтой 174 тэрбум төгрөгийн Төв банкны үнэт цаасыг 10.92 хувийн жигнэсэн дундаж хүүтэйгээр арилжаалжээ. Харьцангуй урт хугацаатай санхүүгийн хэрэгслийг мөнгөний зах дээр бий болгох угтвар нөхцлийг бүрдүүлэх үүднээс Монголбанк дөрвөн долоо хоногийн хугацаатай Төв банкны үнэт цаасыг нэвтрүүлээд байгаа юм. Монголбанк нэг долоо хоногийн Төв банкны үнэт цаасны хүүгээр дамжуулан зөвхөн богино хугацааны хүүнд нөлөөлөхийг оролддог бол  дөрвөн долоо хоногийн хугацаатай Төв банкны үнэт цаасны хүү нь ирээдүйн арилжаа, эрсдлийн болон нөөцийн үнийн хүлээлт зэрэг хүчин зүйлстэй уялдаж банк хоорондын зах дээр тодорхойлогддог байна. 

Холбоо барих: minjma.g@bloombergtvmongolia.com