Нью-Йорк хотод “COVID-19”-ийн халдвар авсан хүний тоо нэг өдөрт 9000-аар нэмэгдлээ. Ингэснээр нийт халдвар авсан хүний тоогоор Нью-Йорк хот анхны голомт болох Хубэй мужийг даваад байна. Түүнчлэн нэг өдөрт 300 гаруй хүн нас барж, нийт нас баралт 1000 давжээ.

Цагаан ордны ажлын хэсгийн тэргүүн энэхүү халдварын улмаас АНУ-д 200 мянган хүн нас барна гэж таамаглаж байгаа ажээ. Харин АНУ-ын Ерөнхийлөгч Дональд Трамп хэдхэн цагийн өмнө хийсэн мэдэгдэлдээ "Ирэх хоёр долоо хоног хүндхэн байх болно" гэж анхааруулсан байна.

АНУ-ын Ерөнхийлөгч Дональд Трамп
“Бид энэхүү үхлийн вирусийн эсрэг дайн зарлаад байна. Энэ үед бидний хамтын хүч, хайр энэрэл, хүн бүрийн мэрийлт маш чухал. Тэр дундаа эмзэг бүлгийнхэнд туслах боломж бид бүгдэд бий. Тиймээс бид өөрсдийн зөв гэж бодож буй зүйлсээ хийх нь чухал байгаа юм. Ирж буй хүндхэн өдрүүдэд хүн бүрийг бэлэн байгаасай гэж хүсэж байна. Бид маш хүнд хоёр долоо хоногтой нүүр тулах гэж байна. Үүний дараа хонгилын үзүүрт гэрэл харагдана гэж мэргэжилтнүүдийн таамаглаж байгаа. Тийм байгаасай гэж би найдаж байна. Гэхдээ маш хүнд хоёр долоо хоног бидний өмнө ирээд байна” гэж онцоллоо.

Шинэ төрлийн “коронавирус”-ийн халдвар газар авах тусам АНУ-д амьсгалын аппаратын хэрэгцээ нэмэгдсээр байна. Нью-Йорк хотын захирагч түр зогсолтод ороод байгаа эмнэлгийн байгууллагуудыг амьсгалах аппарат хандивлахыг уриалжээ. Түүнчлэн Калифорни мужийн захирагч ирэх өдрүүдэд амны хаалтын хэрэглээтэй холбоотой зөвлөмж гаргана гэдгээ мэдэгдсэн байна. 40 сая хүн амтай Калифорни муж аль хэдийн амны хаалтын дутагдалд ороод байгаа юм.

Харин Европт “COVID-19”-ийн тархалт тогтворжиж эхэлсэн гэж Дэлхийн эрүүл мэндийн байгууллага мэдээлээд байна. Испанид шинэ төрлийн “коронавирус”-ийн тархалт өнгөрсөн долоо хоногт 20 хувьтай байсан бол энэ долоо хоногт 11 хувь болж буурсан гэж тус улсын Эрүүл мэндийн сайд онцолжээ. Хэдий тийм боловч сүүлийн 24 цагийн хугацаанд нас барсан хүний тоо 849-өөр нэмэгдэж, 8100 давсан байна. Мөн нэмж 9222 хүн “COVID-19”-өөр өвчилсөн нь 24 цагийн доторх хамгийн өндөр өсөлтөд тооцогдож байгаа юм. Тус улсад халдвар авсан хүний тоо 95 мянга 923 болжээ.

Олон улсад “COVID-19”-ийн халдвар авсан хүний тоо 857 мянга давж, 42.1 мянган хүн нас бараад байна. Харин эдгэрсэн хүний тоо 177.1 мянга байна.

Б.Төгсбилиг | @TugsbiligB

Холбоо барих: tugsbilig.b@bloombergtvmongolia.com

minjma.g@bloombergtvmongolia.com