Нийслэлийн Засаг даргын захирамжийн дагуу Улаанбаатар хотын ирэх оны төсвийн төсөлд Улаанбаатар хотын өрх бүрээс санал авч, хэлэлцүүлэх ажил үргэлжилж байгаа талаар Нийслэлийн Хэвлэл мэдээлэл, олон нийтийн харилцах хэлтсээс мэдээллээ. Хэлэлцүүлгийг зохион байгуулж буй ажлын хэсгээс мэдээлснээр нийт 152 хорооноос 64 мянга гаруй санал асуулгын хуудас ирснээс 58 мянга гаруй саналын хуудасны дүн гарчээ. Саналын хуудсыг гэр хорооллын болон орон сууцны өрх гэсэн хоёр хувилбартайгаар тараасан бөгөөд асуулгад оролцсон нийт өрхийн 41 хувь нь цэцэрлэг барих саналыг сонгосон байна. Мөн гэр хорооллын өрхийн 40.9 хувь нь цэвэр бохир усан хангамж, орон сууцны өрхийн 40.1 хувь нь нэгдсэн граж, авто зогсоолтой болох шаардлагатай гэж үзжээ. Түүнчлэн тохижилтын чиглэлээр саналаа өгсөн гэр хорооллын өрхийн 45.5 хувь нь гэрэлтүүлэг, орон сууцын өрхийн 44.1 хувь нь ногоон байгууламжийг нэмэгдүүлэх хэрэгтэй гэсэн байна. Энэ хүрээнд иргэдийн өгсөн саналаас хамгийн олон санал авсан ажлуудыг жагсааж, хороо бүр дээр “Иргэний оролцоотой төсөв-2014” шууд хэлэлцүүлэгийг зохион байгуулах аж. Үүнээс гадна Нийслэлийн ИТХ-ын ээлжит бус дөрөвдүгээр хуралдаан энэ сарын 14-нд болох ба энэ үеэр Нийслэлийн 2013 оны төсөвт өөрчлөлт оруулах тухай асуудлыг хэлэлцэх юм байна.

Холбоо барих: Tsatsralt.b@bloombergtvmongolia.com