Зургаадугаар сарын долооны байдлаар 9631 сорьцод шинжилгээ хийхэд 1267 хүнээс “коронавирус”-ийн халдвар илэрч, улсын хэмжээнд “Covid-19”-ийн халдварын батлагдсан нийт тохиолдол 67 мянга 710 боллоо.

Сүүлийн нэг хоногт “Covid-19”-ийн нэн хүнд хэлбэрээр таван хүн нас барсныг Эрүүл мэндийн яам мэдээлэв. Өнөөдрийн байдлаар “коронавирус”-ийн халдварын улмаас 318 хүн нас бараад байна.

Дотоодод “коронавирус”-ийн халдвар анх тархсанаас хойш зургаан сарын хугацаанд батлагдсан нийт тохиолдол 30 мянга хүрээд байгаа юм. Түүнчлэн сүүлийн нэг сар гаруйн хугацаанд дотоодод 37 мянга гаруй хүн халдвар авчээ.

Сүүлийн 24 цагт батлагдсан шинэ тохиолдлуудын дийлэнх буюу 60 гаруй хувь нь нийслэлд бүртгэгдсэн байна. Мөн орон нутагт халдварын тохиолдол эрс нэмэгдэж байгаа ба хоёр хоногийн дотор 615 тохиолдол илэрчээ. Улаанбаатараас орон нутаг руу зорчих хөдөлгөөн нэмэгдсэн, кластер халдварууд үргэлжилж байгаа нь халдвар нэмэгдэхэд нөлөөлж байгааг Эрүүл мэндийн яам мэдээлж байна.

Харин улсын хэмжээнд 1.5 сая гаруй иргэн “Covid-19”-ийн эсрэг вакцины хоёр дахь тунгаа хийлгээд байна. Харин нийслэлийн зорилтот бүлгийн иргэдийн 84.2 хувь нь бүрэн тунд хамрагджээ.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com