Нэгдүгээр сарын зургааны өдрийн байдлаар COVID-19-ийн халдварын 570 тохиолдол батлагдсаныг Эрүүл мэндийн яам мэдээлэв.

Нийслэлд COVID-19-ийн халдварын 339, орон нутагт 212, зөөвөрлөгдсөн 19 тохиолдол бүртгэгджээ. Сүүлийн нэг хоногт Өмнөговь аймагт хамгийн олон буюу 29 тохиолдол батлагдсан байна. Зөөвөрлөгдсөн тохиолдлууд ихэвчлэн Турк, Тайланд, Дубайд групп аяллаар аялаад ирсэн иргэд байгаа аж.

Өнөөдрийн байдлаар улсын хэмжээнд PCR шинжилгээгээр батлагдсан нийт тохиолдол 392 мянга 759 боллоо.

Харин түргэвчилсэн шинжилгээний хариуг оруулан тооцдог E-Mongolia-ийн мэдээллээр “коронавирус”-ийн халдварын батлагдсан тохиолдол хоногт 1869-өөр нэмэгдэж, 697 мянга 810 болоод байна.

Сүүлийн нэг хоногт “коронавирус”-ийн халдварын улмаас хоёр хүн нас баржээ. COVID-19-ийн нэн хүнд хэлбэрээр 2067 хүн эндээд байна. Улсын хэмжээнд COVID-19-өөр өвчилсөн 2843 хүн эмнэлэгт хэвтэн эмчлүүлж байгаа бол 5352 хүн Өрхийн эмчийн хяналтад гэрээр эмчлүүлж байгаа аж.

Пүрэв гарагийн байдлаар улсын хэмжээнд 926 мянга 184 хүн буюу нийт хүн амын 28.5 хувь нь дархлаа сэргээх нэмэлт тунд хамрагдаад байна. Өнгөрсөн нэг хоногт 3503 хүн гурав дахь тун хийлгэжээ.

Холбоо барих: minjma.g@bloombergtvmongolia.com