Сүүлийн өдрүүдэд дотоодод “Covid-19”-ийн халдварын тархалт эрчимтэй нэмэгдэж байна. Мягмар гарагийн байдлаар 206 хүнээс “коронавирус”-ийн халдвар илэрч, улсын хэмжээнд батлагдсан нийт тохиолдол 5392 боллоо.

Харин энэ сарын 23-ны өдрийн 19.00 цагийн байдлаар улсын хэмжээнд 232 мянга 757 хүн “коронавирус”-ийн эсрэг дархлаажуулалтад хамрагдаад байгааг НЗДТГ мэдээллээ. Үүнээс 6330 хүн Өмнөговь аймагт вакцины эхний тунг хийлгэсэн байна.

Өдөрт “коронавирус”-ийн халдвар илрүүлэх 15-20 мянга гаруй лабораторийн шинжилгээ хийж байсан бол сүүлийн өдрүүдэд энэ тоо 9-12 мянга болж буураад байна. Энэ талаар Эрүүл мэндийн яамнаас PCR шинжилгээний тоог аль болох цөөлж, вакцинжуулалтдаа илүү анхаарах бодлого баримталж байгаа гэж тайлбарлалаа.

Үүнээс гадна лхагва гарагт энэ сарын 10 дахь тусгай үүргийн нислэгийг Сөүл чиглэлд үйлдэж байна. Тус нислэгээр 160 орчим иргэн ирэх товтой байгааг Гадаад харилцааны яам мэдээлсэн юм. Харин пүрэв гарагт Токио чиглэлээс мөн 160 орчим иргэн ирэх хуваарьтай байна. Гуравдугаар сард тусгай нислэгээр 1300 гаруй иргэн иржээ.

Б.Энхжин

Холбоо барих: enkhjin.b@bloombergtvmongolia.com

minjma.g@bloombergtvmongolia.com