Өнгөрсөн сарын эцсийн байдлаар Монгол Улсын зах зээл дээрх нийт М2 мөнгө найман их наяд төгрөгт хүрсэн байна. Үүний гурван тэрбум орчим төгрөгийг нь өнгөрсөн оны аравдугаар сард эхэлсэн үнэ тогтворжуулах дэд хөтөлбөрүүдийн хүрээнд зах зээлд зорилттой нийлүүлсэн төгрөг бүрдүүлжээ. Өөрөөр хэлбэл, дэд хөтөлбөрүүдийн хүрээнд зах зээлд нийлүүлсэн бэлэн мөнгийг хасаад харвал М2 мөнгө долдугаар сард нэг жилийн өмнөхөөс хоёр их наяд орчим төгрөг буюу 27 хувиар буурсан тооцоо гарч байна. Үүнээс өмнө буюу 2008-2009 оны хямралын жилүүдэд мөнгөний нийлүүлэлт гурван улирлын хугацаанд 14.6 хувиар буурч байсан нь санхүүгийн хямралын нэг шалтгаан болж байсан юм. Тухайн үед Монгол Улсын ажиллах хүчин 77 мянгаар буурч байсан бол энэ жилийн хувьд 5.1 мянгаар буурсан болохыг Үндэсний статистикийн хорооны мэдээллээс харагдаж байна. Зах зээл дээрх бэлэн мөнгөний нийлүүлэлт буурсан тохиолдолд зээлийн тасалдал бий болж, санхүүгийн салбар хямрахад хүрдэг ч энэ жилийн хувьд зээлийн өсөлт мөнгөний нийлүүлэлттэй нийцэн өссөн дүнтэй гарчээ. Мөн зээл олголт зорилтот салбаруудад чиглэсэнтэй холбоотойгоор мөнгөний нийлүүлэлтийн өндөр өсөлт хэрэглээний үнийн индекст дарамт болоогүй байна. Тухайлбал, мөнгөний нийлүүлэлтийн сарын өсөлт 1.1 хувь байсан ч хэрэглээний үнийн өсөлт ердөө 0.1 хувьтай байсан юм. Гэвч эдийн засагчдын хийсэн тооцоогоор 2008-2009 онд мөнгөний нийлүүлэлт 15 орчим хувиар буурахад 33 хувиар савлаж байсан валютын ханш энэ жил 40 орчим хувиар савлах тооцоотой байна.

Б.Дуламхорлоо

Холбоо барих: Dulamkhorloo.b@bloombergtvmongolia.com

Munkhjin.ts@bloombergtvmongolia.com