Үндэсний Статистикийн Хорооноос 2013 оны эдийн засгийн үзүүлэлтүүдийг урьдчилсан байдлаар гаргаж эхлээд байна. Монгол Улсын гадаад худалдааны урьдчилсан үзүүлэлтээс харахад гадаад худалдааны нийт бараа эргэлт өнгөрсөн онд 10 тэрбум 627.4 сая ам.долларт хүрсэн нь нэг жилийн өмнөхөөс 4.45 хувиар буурсан үзүүлэлт болж байна. Харин нийт экспортын хэмжээ 2013 онд дөрвөн тэрбум 272.7 сая ам.долларт хүрсэн нь өмнөх оноос 2.5 хувиар буурсан дүн болж байна. Мөн зарим эрдэс бүтээгдэхүүний экспортын хэмжээ нэмэгдсэн дүнтэй байгаа ажээ. Тухайлбал экспортолсон зэсийн баяжмалын хэмжээ 2012 оны эцсийн байдлаар 574.3 мянган тонн байсан бол өнгөрсөн онд 13 хувиар өссөн байна. 2012 онд Монгол Улс 3.5 сая тонн газрын тос экспортолж байсан бол 2013 онд 5.2 сая тонн болж өсчээ. 2013 онд нүүрсний экспортын хэмжээ өмнөх оноос 2548 тонноор буурсан бол импорт 2012 онд зургаан тэрбум 738.4 сая ам.доллар болж, 2013 онд 5.6 хувиар буурч зургаан тэрбум 354.7 сая ам.долларт хүрсэн байна. Харин гадаад худалдааны алдагдал өмнөх оноос 11.5 хувиар буурсан байна. 2011 онд нэг тэрбум 780.9 сая ам.доллар байсан гадаад худалдааны алдагдлын хэмжээ 2012 онд  хоёр тэрбум 353.7 тэрбум ам.доллар болж өсөөд байсан ч  өнгөрсөн онд алдагдлын хэмжээ нь хоёр тэрбум 82 сая ам.доллар болж буурчээ. 

Э.Анхбаяр 

Холбоо барих: ankhbayar.e@bloombergtvmongolia.com 

minjma.g@bloombergtvmongolia.com