Тавдугаар сарын 15-нд ОХУ-аас татан авсан цэргийн сургуулийн сонсогчдоос “COVID-19”-ийн зургаан тохиолдол нэмж бүртгэгдлээ. Ингэснээр Монгол Улсад батлагдсан тохиолдлын тоо 185 болоод байна.

Өнөөдрийн байдлаар 44 хүн эдгэрээд байгаа бол эмчилгээнд141 хүн байгаагийн 23-ийнх нь биеийн байдал хүндэвтэр байна.

Батлагдсан нийт тохиолдлуудыг харвал сүүлийн нэг сар хүрэхгүй хугацаанд дөрөв дахин нэмэгдээд байна. Энэ хугацаанд гадаадаас татан авсан иргэдийн тоо нэмэгдсэн юм. Мөн удах тусам зөөвөрлөгдөн ирж буй тохиолдлын тоо нэмэгдэх эрсдэлтэй байна. Тухайлбал: шинэ төрлийн “коронавирус”-ийн анхны тохиолдол гуравдугаар сард татан авсан иргэдэд эзлэх “COVID-19”-ийн хувь хэмжээ 0.8 хувь байсан бол тавдугаар сард энэ үзүүлэлт 8.1 хувь болж эрс нэмэгдлээ.

Түүнчлэн энэ сард 2000 гаруй иргэнээ гадаад улсаас татан авна гэж Улсын онцгой комисс мэдээлсэн юм. Урьдчилсан байдлаар зургаадугаар сарын 10-нд Казахстан, 11-нд Япон, 15-нд БНЭУ, 17, 18-нд БНСУ, 19-нд ХБНГУ руу тусгай үүргийн нислэг үйлдэнэ. Харин сонгуулийн дараагийн өдөр буюу зургаадугаар 25 болон 28-нд үйлдэх нислэгийн чиглэл хараахан тодорхой болоогүй байна.

Б.Төгсбилиг | @TugsbiligB

Холбоо барих: tugsbilig.b@bloombergtvmongolia.com

minjma.g@bloombergtvmongolia.com