2022-2023 онд биржээр Төрийн мэдлийн хувьцааг нээлттэй худалдах, олон нийтийн хяналтад шилжүүлэх Төрийн өмчит хуулийн этгээдийн жагсаалтыг Засгийн газар баталлаа.

“Монголын Хөрөнгийн бирж” ТӨХК-ийн 34 хүртэлх хувийг 2022 оны IV улиралд багтаан олон нийтэд нээлттэй арилжаалахаар Засгийн газрын хуралдаанаар шийдвэрлэсэн байна.

“Монголын Хөрөнгийн бирж” 1991 онд байгуулагдсанаас хойш 2011 онд Лондоны Хөрөнгийн биржтэй ажлын мастер гэрээ байгуулж, 2015 оноос өөрийгөө зохицуулах байгууллага болж өөрчлөгдөөд байсан юм. 2016-2020 оны хооронд “Монголын Хөрөнгийн бирж”-ийн баланс 5.7 тэрбум төгрөгийн алдагдалтай байсан бол 2021 онд анх удаа 3.3 тэрбум төгрөгийн ашигтай ажилласан байна.

2021 онд “Монголын Хөрөнгийн бирж” 5.5 тэрбум төгрөгийн орлоготой ажилласан нь өмнөх оноос 4.9 дахин өсжээ. Үйл ажиллагааны зардал нь 1.23 тэрбум төгрөг, MIT системийн ашиглалтын зардал 938 тэрбум төгрөг төлсөн нь өмнөх хоёр жилийн түвшинтэй ойролцоо байсан байна.

Харин 2023 оны эхний улиралд багтаан “Монголын цахилгаан холбоо”, “Үндэсний давхар даатгал” зэрэг компаниудын 34 хүртэлх хувийг олон нийтэд нээлттэй болгох юм байна.

Цаашид Засгийн газраас батлагдсан жагсаалтын хүрээнд бусад 22 аж ахуйн нэгжийн 34 хүртэлх хувийг хөрөнгийн зах зээлд олон нийтэд нээлттэй болгох юм байна.

Мөн зарим аж ахуйн тооцоот үйлдвэрийн газруудыг татан буулгаж, нэгтгэн шинэчлэх ажлуудыг хийхээр болжээ.

Засгийн газрын тэмдэглэлийн хүрээнд ирэх наймдугаар сард нэгтгэх, өөрчлөх асуудлыг дахин хэлэлцүүлэхээр үүрэг өгсөн байна.

Монгол Улсад 470 гаруй Төрийн өмчийн болон Төрийн оролцоотой аж ахуйн нэгж үйл ажиллагаа явуулж байна гэж УИХ-ын чуулганы хуралдааны үеэр мэдээлж байсан юм. Эдгээр компаниудын засаглалыг сайжруулах, ТУЗ-ийн чиг үүрэг, оролцоо, хариуцлагыг сайжруулах зайлшгүй шаардлагатай гэж салбарынхан үзэж байна.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com