Зургаадугаар сарын урьдчилсан гүйцэтгэлээр Монгол Улсын төлбөрийн тэнцэл 9.94 сая ам.долларын алдагдалтай гарсан болохыг Монголбанк мэдээллээ. Алдагдал өмнөх сараас буурсан ч 2021 оны эцсийн дүнтэй харьцуулахад өссөн байна.

Урсгал дансны алдагдал өмнөх сараас нэмэгдэж, 462.93 сая ам.доллар болжээ. Энэ нь улс орнуудтай хийсэн худалдааны дансны алдагдал, тээвэр, аялал болон бусад үйлчилгээний дансны алдагдал өссөнтэй холбоотой байна.

Зургаадугаар сард аялал, жуулчлалын улирал идэвхжиж эхэлсэн ч аяллын үйлчилгээний дансны тэнцэл алдагдалтай гарчээ. Харин хөрөнгийн дансны ашиг өмнөх сараас өсөж, 22.25 сая ам.доллар болсныг Монголбанкны тайланд дурдсан байна.

Мөн төлбөрийн тэнцлийн голлох дансны нэг болох санхүүгийн дансны тэнцэл зургаадугаар сарын урьдчилсан гүйцэтгэлээр 274.56 сая.долларын алдагдалтай гарсан байна.

Зургаадугаар сарын байдлаар Монгол Улсын гадаад валютын албан нөөцийн үлдэгдэл гурван тэрбум 97.2 сая ам.доллароор хэмжигдэж байна. Энэ нь өмнөх сараас 0.93 хувиар буурсан дүн болж байгааг Монголбанк мэдээллээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com