2021 оны 12 дугаар сард Монголбанк 780 кг үнэт металл худалдан авсан байна. Өнгөрсөн оны аравдугаар сард 3.2 тонн алт худалдан авсан нь сарын дүнгээр хамгийн өндөр хэмжээ болжээ.

Харин бүтэн жилийн хувьд нийт 21 тонн үнэт металл худалдан аваад байна. Энэ нь 2019 онтой харьцуулахад 36.8 хувиар өссөн ч 2020 оноос 12 орчим хувиар буурсан дүн боллоо.

2020 онд Төв банкны худалдан авсан үнэт металлын хэмжээ 23.6 тонн болж, түүхэн дээд түвшинд хүрч байв.

Үнэт металлын худалдан авалт нэмэгдэх нь гадаад валютын албан нөөцийн хэмжээ нэмэгдэхэд эергээр нөлөөлдөг. Цаашлаад төгрөгийн тогтвортой байдлыг хангах чухал ач холбогдолтой.

Сүүлийн 5-6 жилийн хугацаанд Монголбанкны алт худалдан авалт 100 орчим тонн хүрч, нөөцийг 3.7 тэрбум ам.доллароор нэмэгдүүлсэн байна.

Монголбанк алт худалдан авалтыг нэмэгдүүлэх зорилгоор “Алт-2” хөтөлбөр болон бусад арга хэмжээ аваад байна. Тухайлбал: алт олборлогч компаниудын үйл ажиллагааг дэмжиж, алтаар эргэн төлөгдөх нөхцөлтэй зээл олгож эхэлсэн юм. Мөн үнэт металлын арилжаа эрхэлж байгаа иргэдэд Санхүүгийн зохицуулах хорооноос тусгай зөвшөөрөл олгож, үйл ажиллагааг нь албажуулаад байна.

С.Өнөрсайхан | @unursaikhan_sor

Холбоо барих: unursaikhan.s@bloombergtvmongolia.com

minjma.g@bloombergtvmongolia.com