Монгол Улсын Санхүүгийн зохицуулах хорооноос “МИК” компанийн охин компани болох "МИК АКТИВ -1" тусгай зориулалтын компани байгуулах тусгай зөвшөөрөл олголоо. Мөн тус компанийн Төлөөлөн удирдах зөвлөлийн бүрэлдэхүүн батлагдсан байна. Ингэснээр тус компани найман хувийн хүүтэй орон сууцны ипотекийн зээлийн хөтөлбөрийн хүрээнд хоёрдагч зах зээл дээр үнэт цаас гаргах эрхтэй болж байгаа юм. Одоогийн байдлаар “МИК АКТИВ-1” компани 325-328 тэрбум төгрөгийн үнэт цаас гаргахаар төлөвлөж байгаа тухай тус компанийн ТУЗ-ийн дарга Ө.Мөнх-Ундарга мэдээллээ. Өнөөдрийн байдлаар жилийн найман хувийн хүүтэй орон сууцны ипотекийн зээлийн хөтөлбөрийн хүрээнд 11 мянга 153 иргэн шинээр орон сууцтай болоод байна. Өөрөөр хэлбэл банкууд хөтөлбөр хэрэгжиж эхэлсэнээс хойш нийт 645.6 тэрбум төгрөгийн орон сууцны зээл олгожээ. Харин одоогоор өмнө олгосон ипотекийн зээлээс 797.4 тэрбум төгрөгийн зээлийг дахин санхүүжүүлэх хүсэлт банкуудад ирснээс 16 мянга 726 иргэний хүсэлтийг бүрэн шийдвэрлэж, 470.6 тэрбум төгрөгийн зээлийг дахин санхүүжүүлсэн байна. Ингэснээр нэг талаас иргэд орон сууцны зээлийн хүүгээ найман хувь руу шилжүүлж, нөгөө талаас банкууд зээлийн эх үүсвэрээ суллаж байгаа нь давуу тал юм гэж шинжээчид үзэж байгаа ажээ. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com