2030 он гэхэд Их Британи Германыг гүйцэж, Европын тэргүүлэгч эдийн засагтай улс болно гэж Их Британийн Эдийн засаг, бизнесийн судалгааны төв тооцоолжээ. Хүн амын өсөлт өндөр байгаагаас гадна татвараа бага байлгах бодлого баримталж, санхүүгийн хувьд Евро бүсийн орнуудаас хараат бус байгаа зэрэг нь Их Британийн эдийн засагт эерэг нөлөө үзүүлж байгаа юм байна. Улмаар тус улсын дотоодын нийт бүтээгдэхүүн 2028 он гэхэд 2.64 их наяд фунт стерлингт хүрэх төлөвтэй байгааг тус улсын Эдийн засаг, бизнесийн судалгааны төвөөс мэдээллээ. Харин энэ хугацаанд Германы эдийн засгийн өсөлт бага зэрэг суларч, дотоодын нийт бүтээгдэхүүн нь 2.69 их наяд фунт стерлинг болно гэж шинжээчид таамаглажээ. Германд өндөр настнуудын тоо нэмэгдэж байгаагаас гадна еврогийн ханш суларсан, Евро бүсийн санхүүгийн хэтийн төлөв зэрэг нь үүнд нөлөөлсөн байна. Харин Франц улс иргэддээ өндөр татвар ногдуулахаар болсон нь эдийн засгийн өсөлтөд нь сөргөөр нөлөөлнө гэж шинжээчид дүгнэжээ. Мөн БНХАУ 2028 он гэхэд дотоодын нийт бүтээгдэхүүний өсөлтөөрөө АНУ-ыг ардаа орхиж, дэлхийд тэргүүлэгч эдийн засагтай орон болно гэсэн тооцоог шинжээчид гаргасан байна.

  Т.Элиса 

Холбоо барих: elisa.t@bloombergtvmongolia.com

minjma.g@bloombergtvmongolia.com