Олон улсын зээлжих зэрэглэлийн “S&P” агентлагаас Испанийн зээлжих зэрэглэлийн төлвийг сөргөөс тогтвортой болгож ахиуллаа. Энэхүү шийдвэрийг Испанийн эдийн засаг сэргэж эхэлж байгаад үндэслэн гаргасан байна. Тодруулбал тус улсад хоёр жил гаруй үргэлжилсэн хямрал энэ оны гуравдугаар улиралд эцэс болсны зэрэгцээ Испанийн хөрөнгийн биржийн гол индекс болох “Ibex 35” он гарснаас хойш 21 хувиар өсөөд байгаа юм. Үүнээс гадна “S&P” агентлагаас Нидерландын зээлжих зэрэглэлийг “AAA”-гаас “AA+” болгон бууруулсан байна. Тус улсын эдийн засгийн өсөлтийн төлөв өмнө нь тооцоолж байснаас тааруу дүнтэй гарсан учраас ийм шийдвэрт хүрчээ. Ингэснээр үнэлгээ тогтоодог гурван гол агентлагаас хамгийн өндөр үнэлгээ авсан улс орнуудын тоо арав болж цөөрч байгаа юм. Түүнчлэн “S&P” агентлаг Киприйн зээлжих зэрэглэлийг “-B”-ээс “ССС+” болгож нэмэгдүүллээ. Гэхдээ олон улсын зах зээл дэх бондын өгөөжийн өөрчлөлтийг харвал хөрөнгө оруулагчид “Moody’s” агентлагийн нийт үнэлгээний 56 хувийг харин “S&P”-ийн 50 хувийг үл харгалзан хөрөнгө оруулалтын шийдвэрээ гаргасан байна. Өөрөөр хэлбэл өнгөрсөн жилийнхтэй харьцуулахад дээрх агентлагуудын үнэлгээг харгалзан шийдвэр гаргах нь “буураад байна” гэсэн үг юм.

Э.Анхбаяр

Холбоо барих: Ankhbayar.e@bloombergtvmongolia.com

Tsatsralt.b@bloombergtvmongolia.com