Монгол Улсын иргэд бэлэн бус төлбөр тооцоог илүүтэй сонгох болсныг гуравдугаар улирлын эцсийн байдлаарх тайлангаас харж болохоор байна. Тухайлбал, гуравдугаар улирлын эцсийн байдлаар нийт гүйлгээний үнийн дүнгийн 82.9 хувийг нь бэлнээр гүйцэтгэсэн байхад 17.1 хувийг нь бэлэн бусаар гүйцэтгэжээ. Үүнийг эхний хагас жилийн дүнтэй харьцуулахад бэлэн бус төлбөр тооцооны дүн өссөн байна. Түүнчлэн гуравдугаар улирлын эцэст Монгол Улсын хэмжээнд давхардсан тоогоор 3.4 сая хүн төлбөрийн карт эзэмшиж байсан нь 2012 оны эцсийн байдалтай харьцуулахад 21 хувиар өссөн дүн болжээ. Ялангуяа үндэсний төгрөгийн "₮ карт"-ын хэрэглээ зургаа дахин өссөн байна. 2012 онд үндэсний төгрөгийн "₮ карт" хэрэглээнд нэвтэрснээс хойш нэг жилийн хугацаанд 91 мянга 321 хүн ашиглаж байсан бол энэ оны гуравдугаар улирлын эцсийн байдлаар нийт хүн амын 672.5 мянга нь ашигладаг болжээ. Түүнчлэн төлбөрийн картаар дамжуулан онлайнаар хийсэн гүйлгээ дийлэнх хувийг эзэлж байгаа бол 24 хувийг мобайл банк, 7.1 хувийг интернет банкны гүйлгээ бүрдүүлж байгаа нь өмнөх улирлаас бараг өөрчлөлтгүй байна. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com