Аравдугаар сарын эцсийн байдлаар хэрэглээний үнийн улсын индекс энэ оны эхнээс 9.7 хувиар өссөн тухай мэдээг Үндэсний Статистикийн хорооноос танилцууллаа. Хэдийгээр аравдугаар сарын эцэст инфляцийн түвшин өмнөх сараас 1.4 хувиар өссөн боловч сүүлийн хоёр жилийн бага үзүүлэлтэд тооцогдсон хэвээр байна. Өөрөөр хэлбэл инфляцийн өсөлтийн хурд өнгөрсөн жилүүдтэй харьцуулахад саарчээ. 2013 оны аравдугаар сарын эцсийн байдлаар улсын хэмжээнд инфляцийн түвшин оны эхнээс 9.7 хувиар өссөн дүнтэй гарлаа. Аравдугаар сард хэрэглээний үнийн улсын индекс өмнөх сараас 1.4 хувиар өсч оны эхнээс 9.7 хувьд хүрсэн боловч энэ нь сүүлийн хоёр жилийн хамгийн багад тооцогдсон хэвээр байна. Тухайлбал өнгөрсөн 2012 оны аравдугаар сарын эцсийн байдлаар хэрэглээний үнийн индекс улсын хэмжээнд 13 хувийн өсөлттэй байсан бол энэ онд 9.7 хувьтай байгаа нь 3.3 орчим нэгжээр доогуур байгаа үзүүлэлт юм. Онцлохоор үзүүлэлт нь өмнөх жилүүдэд индекс өсөхөд хамгийн ихээр нөлөөлдөг байсан махны үнэ буурч, шатахууны үнэ тогтвортой байлаа. Харин индекс өмнөх сараас 1.4 хувиар өсөхөд хувцас гутал, бөс барааны бүлэг болон орон сууц, ус, цахилгаан, түлшний бүлгийн үнэ өссөн нь түлхэц үзүүлжээ. Улсын хэмжээнд инфляцийн сарын өсөлтийн дундаж түвшин 1.4 хувьтай байна. Харин Увс аймагт үнэ өөрчлөлтгүй байгаа бол найман аймгийн үнийн өсөлт улсын дунджаас бага байгаа ажээ. Тухайлбал дээрх аймгуудад инфляцийн түвшин 0.4-1.2 хувийн өсөлттэй байгаа бол бусад аймгууд дунджаас дээгүүр байна.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com