Оны эхний улиралд Засгийн газрын гадаад өр 8.4 тэрбум ам.доллар болж, өмнөх оны мөн үеэс 1.1 тэрбум ам.доллароор өсөөд байна.

Харин 2020 оны эцэст Засгийн газрын нийт өр 27.8 их наяд төгрөг болж, жилийн өмнөхөөс 16.6 хувиар өсжээ. Цар тахал дэгдсэн 2020 онд макро эдийн засгийн гол үзүүлэлтүүд муудсан юм. Дотоодын нийт бүтээгдэхүүн 2020 онд 5.3 хувиар агшсан бол төсвийн алдагдал урьд өмнө байгаагүй өндөр түвшинд хүрсэн байна.

Засгийн газар сүүлийн жилүүдэд өрийг өрөөр буюу бондыг дахин санхүүжүүлэх байдлаар арга хэмжээ авч байна. Өндөр хүүтэй, хугацаа тулсан “Мазаалай” болон “Чингис” бондыг хэсэгчилсэн байдлаар дахин санхүүжүүлэхээр “Номад” бондыг гаргасан юм.

Ирэх онуудад төлөгдөх өр төлбөрийг харвал 2022 оны 12 дугаар сард “Чингис” бонд, 2023 онд “Гэрэгэ”, 2024 онд “Хуралдай”, 2026 онд “Номад” бонд байгаа аж. Үүн дээр нэмээд цар тахлын үед нийгмийн чиглэлийн зарцуулалтууд өссөн учраас өр төлбөрийн хувьд ачаалалтай жилүүд хүлээгдэж байна.

С.Өнөрсайхан | @unursaikhan_sor

Холбоо барих: unursaikhan.s@bloombergtvmongolia.com

minjma.g@bloombergtvmongolia.com