"Үүрэгт ажлаа хүлээж аваад эхний 100 хоногт “COVID-19”-ийн эсрэг вакцинжуулалтад ашигласан вакцины тун хэмжээг 100 саяд хүргэх амлалтдаа хүрч байна" хэмээн АНУ-ын Ерөнхийлөгч Жо Байден мэдэгдлээ.

Өөрөөр хэлбэл энэ баасан гарагийн байдлаар буюу төлөвлөгөөт хугацаанаасаа зургаан долоо хоногийн өмнө энэхүү зорилтоо амжилттай биелүүлж байгаагаа тэрбээр онцолжээ.

Тус улс пүрэв гарагийн байдлаар вакцинжуулалтад 2.7 сая тун вакцин ашиглаж, нийт дүнгээр 115.7 сая тун вакцин иргэддээ хийгээд байгааг АНУ-ын “CDC” байгууллага мэдэгдлээ. Нэгдүгээр сарын 20 буюу Жо Байденыг тангараг өргөх ёслолын өдрийн байдлаар 16.5 сая орчим тун вакцин хийгээд байсан юм.

Түүнчлэн Жо Байдены засаг захиргаа Мексик, Канад тэргүүтэй хөрш улс орнууддаа “AstraZeneca”-ийн дөрвөн сая тун вакцин илгээхээр төлөвлөж байгаа гэж Цагаан ордноос мэдээлээд байна. Үүнээс 2.5 сая тун вакцин нь Мексикт, 1.5 сая тун вакцин Канадад ногдож байгаа аж. Ийнхүү АНУ дотооддоо үйлдвэрлэсэн вакцинаа анх удаа экспортлохоор болоод байна.

Ц.Бадмаараг

Холбоо барих: badmaarag.ts@bloombergtvmongolia.com

minjma.g@bloombergtvmongolia.com