АНУ-ын Ерөнхийлөгч Жо Байден нийгмийн дундаж давхаргыг дэмжих, хөрөнгө оруулалт, дэд бүтцийн төсвийг их хэмжээгээр нэмэгдүүлэх төлөвлөгөөг зарлалаа.

Эдийн засгийг дэмжих урт хугацааны хөтөлбөрийг дараа долоо хоногт дэлгэрэнгүй танилцуулах аж. Жо Байдены засаг захиргаа энэхшш хөтөлбөрт гурван их наяд ам.доллар зарцуулахаар төлөвлөж байна. Цаашид шинжлэх ухаан, технологийн салбарын төсвийн хэмжээг дотоодын нийт бүтээгдэхүүний хоёр хувьтай тэнцэх хэмжээнд хүртэл ахиулахыг мэдэгджээ. Ялангуяа анагаах ухаан, хиймэл оюун, квант тооцооллын салбарт төвлөрөхөөр байна.

Үүнээс гадна Жо Байден 2024 оны АНУ-ын Ерөнхийлөгчийн сонгуульд дахин нэр дэвшихээр төлөвлөж буйгаа хэлсэн юм. Түүнчлэн тэрбээр "Намайг үүрэгт ажлаа гүйцэтгэх хугацаанд БНХАУ АНУ-ын байр суурийг булаахгүй" хэмээн онцолсон байна.

АНУ-ын Ерөнхийлөгч Жо Байден
“Ерөнхийлөгч Ши Жиньпинтэй ярилцахад тун амар байсан. Би түүнд хэлсэн. Улс орныхоо үнэт зүйлийг төлөөлөхгүй ямар ч удирдагч байр сууриа хадгалж чадахгүй гэдгийг. Америкчууд эрх чөлөөг үнэлдэг. Америк хүний эрхийг үнэлдэг. Бид үргэлж өөрсдийн хүлээлтийг давахаар байдаггүй ч үнэ цэн, үнэт зүйлдээ тулгуурладаг, энэ зарчим дээр үндэслэн байгуулагдсан улс. Хэрэв та болон танай улс хүний эрхийг үргэлжлэн зөрчсөөр байвал бид үргэлжлэн дэлхий даяар өршөөлгүйгээр үүний эсрэг зогсохыг уриалах болно. Бас юу болоод байгааг тодорхой болгох болно. Тэр ч гэсэн ойлгосон. АНУ-ын ямар ч Ерөнхийлөгч Уйгурт, Хонгконгт юу болж байгаа талаар дуугүй сууж чадахгүй. Гэхдээ нэг нь тэгсэн л дээ” гэж мэдэгдлээ.

Ж.Зоригт | @TeraReader

Холбоо барих: zorigt.j@bloombergtvmongolia.com

minjma.g@bloombergtvmongolia.com