ОХУ-ын Ерөнхийлөгч Владимир Путин, Туркийн Ерөнхийлөгч Режеп Тайип Эрдоаны хамт “Trukstream” байгалийн хий дамжуулах хоолойг албан ёсоор нээлээ. АНУ эсэргүүцэж байгаа энэ үед ОХУ ийнхүү Европыг чиглэсэн экспортын чиглэлээ төрөлжүүлж байна.

Энэхүү хоолой нь Хар тэнгисийн усан доогуур хоёр хос хоолой бүхий замыг байрлуулсан, тус бүрдээ жилд 15.7 тэрбум, нийт 31.5 тэрбум куб метр хий дамжуулах хүчин чадалтай дэд бүтэц юм. 930 км урт үргэлжлэх энэхүү хоолойг бүрэн ашиглалтад оруулснаар ОХУ-ын байгалийн хийг Турк болон Европын орнуудад хүргэнэ. 15 сая өрхийн хэрэгцээг хангахуйц хэмжээний бүтээгдэхүүн нийлүүлнэ. Үүнээс хагасыг нь Турк улсын дотоод хэрэгцээнд харин хагасыг нь зүүн Өмнөд Европт нийлүүлэх юм байна.

Энэ төсөл нь ОХУ-ыг байгалийн хийн салбарын хамгийн чухал тоглогчийн байр сууриа баталгаажуулах гурван аварга төслийн нэг юм. Өнгөрсөн оны эцсээр БНХАУ-д байгалийн хий нийлүүлэх “Сибирийн хүч” хоолой ашиглалтад орсон бөгөөд мөн “Nordsteam 2” төслийн хүрээнд Европт шууд бүтээгдэхүүн нийлүүлэхээр Балтын тэнгисийн усан доогуур ОХУ-аас Герман хүрэх хоолой барьж байгаа юм. Хэдий тийм боловч гүйцэтгэгч Европын компаниудын эсрэг АНУ-ын Ерөнхийлөгч Дональд Трамп хориг тавьсны улмаас хоёр оны зааг дээр барилгын ажил зогсоод байна. Хэдийгээр АНУ-ын хоригийн улмаас бүтээн байгуулалт түр саатсан ч ойрын нэг жилд ашиглалтад орох боломжтой гэж “Gazprom”-ийн удирдлага онцолж байв.

М.Золбоо| @Manlaizolboo

Холбоо барих: zolboo.m@bloombergtvmongolia.com

minjma.g@bloombergtvmongolia.com