Өнгөрсөн сарын байдлаар Евро бүсийн хэрэглээний үнийн индекс сүүлийн гурван жилийн хамгийн доод хэмжээндээ хүрч буурсан тухай Евростатаас мэдээллээ. Тодруулбал, Евро бүсийн инфляци гуравдугаар сарынхаас 0.5 хувиар буурч 1.2 хувьд хүрсэн нь жилийн өмнөхөөс 1.4 хувиар багассан үзүүлэлт болжээ. Европын Төв банк инфляцийн ямар нэг эрсдэл байхгүйг урьдчилж харсан учраас энэ сарын эхээр бодлогын хүүгээ бууруулах шийдвэр гаргасан гэж шинжээчдийн зүгээс тайлбарлаж байна. Харин цаашид энэ хандлагаа хадгалвал дифляцид орох эрсдэл байгааг анхааруулж байгаа юм. Учир нь эдийн засгийн өсөлтийн удаашралаас шалтгаалан иргэд худалдан авалтаа бууруулж, компаниуд хөрөнгө оруулалтаа татсан нь дифляцийг бий болгож магадгүй байгаа аж. Харин хэрэглээний үнийн индексийн өсөлт огцом саарахад газрын тосны үнэ буурсан нь гол нөлөө үзүүлсэн байна. Евро бүсийн гишүүн орнуудаас онцлоход, Грек улс сүүлийн хоёр сарын турш дифляцийн бүсэд ороод байгаа. Харин Европын Төв банкнаас инфляцийг хоёр хувьд барих зорилт тавиад байгаа төдийгүй бүсийн гадаад худалдааний ашиг түүхэн дээд хэмжээндээ хүрээд байна. Гадаад худалдааны ашиг 18.7 тэрбум евро болсон нь таатай мэдээлэл боловч, хөрөнгө оруулагчдын зүгээс үүнийг иргэдийн эрэлт буурч, худалдан авах чадваргүй болж байгааг нь батлах таагүй үзүүлэлт гэж хүлээж авч байна. Түүнчлэн экспорт 2.8 хувиар өссөн бол импорт 10 хувиар буурсан нь гадаад худалдаа 18 гаруй тэрбум еврогийн ашигтай гарах гол шалтгаан болоод байгаа юм. 

Б.Дуламхорлоо 

 Холбоо барих: dulamkhorloo.b@bloombergtvmongolia.com