Европын Төв Банк сар бүр гаргадаг тайлангаа танилцууллаа. Уг тайланд зээлийн хүүг цаашид урт хугацаанд 0.5 хувь буюу түүнээс доош хэмжээнд барина гэсэн байр сууриа Төв Банкны удирдах зөвлөл дахин илэрхийлсэн байна. Үүнээс гадна эдийн засгийг дэмжихэд шаардлагатай гэж үзвэл урт хугацаанд мөнгөний зөөлөн бодлого баримтална гэдгийг тайланд онцолжээ. Гэхдээ Европын Төв Банк Евробүсийн эдийн засгийн өсөлтийн төлвийг бууруулаад байна. Тухайлбал Евробүсийн эдийн засаг энэ жил 0.4 хувиар агшина гэж тооцоолж байсан бол энэ удаагийн тайланд 0.6 хувиар агшина гэсэн төлвийг гаргажээ. Харин 2014 онд 17 улсыг хамардаг тус бүс нутгийн эдийн засаг 0.9 хувиар өснө гэж тооцсон байна. Европын Төв Банкны тайланд онцолсноор “Евробүсийн инфляци дунд хугацаанд зорилтот хэмжээ болох хоёр хувь болон түүнээс ялимгүй доогуур түвшинд байх” юм байна. Тухайлбал Төв Банк 2013, 2014 оны инфляцийн төлвийг 1.6 хувиас бууруулж 1.5 хувь болгожээ. Үүнээс гадна Евробүсийн бизнесийн болон хэрэглэгчийн итгэлийн индекс сүүлийн үед өссөн дүнтэй гарсныг тайланд онцолсон байна. Түүнчлэн Европын Төв Банк эдийн засаг болон мөнгөний бодлогод цаашид гарах өөрчлөлтүүд үнийн тогтвортой байдалд хэрхэн нөлөөлөхийг анхааралтай ажиглана гэж мэдэгдлээ. Тус банкны үзэж байгаагаар Евробүсийн эдийн засаг хямралаас гарахад хэд хэдэн эрсдэл байгаа ажээ. Тухайлбал дэлхийн санхүүгийн зах зээлүүд дэх тодорхойгүй байдал арилаагүй байгаагаас гадна дэлхийн зах зээл болон дотоодын зах зээл дэх эрэлт таамаглаж байснаас тааруу байж магадгүй байгаа юм байна. Үүнээс гадна Европын Холбооны гишүүн улсуудын засгийн газрууд шаардлагатай шинэчлэлтүүдийг тухай бүрт нь хэрэгжүүлэх чадваргүй байгааг мөн эрсдэл гэж үзжээ.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com