Наймдугаар сард Евробүсийн хэрэглэгчийн итгэлийн индекс зах зээл дэх хүлээлтийг давж өссөн дүнтэй гарлаа. 17 улсыг хамардаг Евробүсийн эдийн засаг хямралын дараа сэргэж эхлээд байна. Европын Комиссын мэдээлснээр, энэ сард Евробүсийн хэрэглэгчийн итгэлийн индекс ес дэх сардаа дараалан өсч хасах 15.6 болсон байна. Энэ нь өнгөрсөн 2011 оны долдугаар сараас хойш гарч байгаагүй хамгийн өндөр үзүүлэлт болжээ. Харин долдугаар сард уг индекс хасах 17.4 байсан юм. Евробүсийн эдийн засаг зургаан улирал дараалан агшсаны эцэст энэ оны хоёрдугаар улиралд 0.3 хувиар өсөөд байна. Үүнээс гадна тус бүс нутгийн эдийн засгийн өсөлт цаашид нэмэгдэж магадгүй байгааг илтгэсэн үзүүлэлтүүд ч гарч байна. Лондонд төвтэй "Markit Economics" байгууллагаас мэдээлснээр наймдугаар сард үйлдвэрлэл, үйлчилгээний салбарын гарц шинжээчдийн таамгаас давсан өсөлттэй гарчээ. Энэхүү мэдээлэл гарсны дараа еврогийн ханш ам.долларын эсрэг чангарсан байна. Евробүсийн эдийн засаг ийнхүү сэргэж эхлээд байгаа ч ажилгүйдлийн түвшин түүхэн дээд хэмжээндээ хүрч өссөн байдалтай байгаа юм. Хоёрдугаар улиралд тус бүс нутгийн эдийн засаг өсөхөд хамгийн том эдийн засагтай хоёр улс болох Герман, Франц улс гол үүрэг гүйцэтгэжээ. Гэхдээ Итали, Испани тэргүүтэй дөрвөн улсын эдийн засаг хямралын байдалд байна. Үүнээс гадна өнгөрсөн зургадугаар сард Евробүсийн жижиглэн худалдаа өмнөх сараас 0.5 хувиар буурчээ. Тиймээс шинжээчдийн дунд Евробүсийн эдийн засаг цаашдаа өснө гэсэн хүлээлт өндөр биш байна.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com