Олон улсад их сургуулийн эрдэмтэд, оюутнууд өөрсдийн санаачилгаар 3D принтер ашиглан нүүрний хаалт хэвлэж, эмнэлгүүдэд хандивлах зэргээр "COVID-19"-ийн арга хэмжээнд хувь нэмэр оруулж эхлээд байна.

Үүнээс гадна эмчилгээ, вакцин хөгжүүлэх чиглэлд бодитой үр дүн харуулаад байгаа юм. Тухайлбал: АНУ-ын “John Hopkins”-ийн их сургууль эдгэрсэн хүмүүсийн цусны сийвэнг эмчилгээнд турших эрхээ аваад байна. Мөн “Pittsburgh”-ийн эрдэмтэд SARS-ийн үед явуулсан судалгаагаа ашиглан "COVID-19"-ийн вакцин хөгжүүлж эхэлсэн байна. Одоогоор амьтад дээр хийсэн туршилтууд амжилттай болсон талаар онцолжээ. Пеннсилвани мужийн их сургууль гэрээр ашиглах боломжтой оношлуур зохион бүтээлцэж эхэлсэн байна. Энэхүү оношлуур нь нэмэлт тоног, төхөөрөмжгүйгээр нэг цаг хүрэхгүй хугацаанд хариу гаргах боломжтой байх юм.

Харин дотоодод "COVID-19"-ийн оношлуурыг онолын хувьд зохион бүтээж, үйлдвэрлэх бүрэн боломжтой гэж Шинжлэх ухааны академийн Ерөнхийлөгч Д.Рэгдэл мэдээллээ. Урвалж нь гарсан байгаа энэ үед ижил төрлийн сорьц, оношлуурыг гарган авах боловсон хүчин хангалттай бэлтгэгдсэн байгааг тэрээр онцолсон. Мөн цаашид энэ төрлийн цар тахлын үед оношлох төхөөрөмжийг дотоодоос хангадаг байх шаардлагатай хэмээн ярьсан юм.

Б.Төгсбилиг

Холбоо барих: tugsbilig.b@bloombergtvmongolia.com

uyanga.m@bloombergtvmongolia.com