Хөдөлмөр эрхлэлтийг дэмжсэн бодлогын үр дүнд 2013 онд 52 мянган иргэн ажилтай, орлоготой болсон гэж холбогдох яамнаас онцолж байна. Ажиллах хүчний ур чадварыг хөгжүүлэх, мэргэжилтэй ажилтан бэлтгэх, хөдөлмөр зуучлалын үйлчилгээг өргөжүүлэх гэсэн гурван суурь зарчмын “Ажилтай, орлоготой Монгол хүн” хөтөлбөрийг хэрэгжүүлж буй. Энэхүү хөтөлбөрийн үр дүнд дөрвөн жилийн дотор 150 мянган ажлын байр нэмэгдүүлэхээр төлөвлөжээ. Түүнчлэн энэ онд хөдөлмөрийн салбарт мөн 50 мянгаас доошгүй ажлын шинэ байр бий болгох зорилт тавьж байна. Мөн хөдөлмөрийн зах зээл дэх хүн амын онцлог бүлгүүдийн хөдөлмөр эрхлэлт, орлогыг дэмжсэн хэд хэдэн шинэ хөтөлбөр эхлүүлэхээр төлөвлөснийг Хөдөлмөрийн сайд Я.Санжмятав дуулгасан. Тухайлбал оюутан залуусын цагийн ажил, зуны амралтын хөдөлмөр эрхлэлтийг дэмжсэн хөтөлбөрт арван мянган оюутныг хамруулахаар төлөвлөжээ. Мөн “Үндэсний мэргэжилтэй ажилтан бэлтгэх хөтөлбөр”-ийн хүрээнд энэ онд эдийн засгийн тэргүүлэх долоон салбарын 56 мэргэжлээр 7000 иргэнийг сургаж, ажлын байртай болгохоор зорьж байна. Үүнээс гадна “Жижиг дунд үйлдвэрлэлийг хөгжүүлэх сан” болон “Сум хөгжүүлэх сан”, “Хөдөлмөр эрхлэлтийг дэмжих сан”-гаас олгож буй зээлийн хэмжээг өсгөж, зээл олгоход гарч буй бэрхшээлийг бууруулна гэж албаны хүмүүс ярьж байна. Харин эдгээр зорилтыг хэрэгжүүлэхэд орон нутгийн оролцоо, хариуцлага чухал учраас орон нутгийн ИТХ-ын дарга, Засаг дарга нарт холбогдох албадаас үүрэг, чиглэл өгчээ.

Холбоо барих: Tsatsralt.b@bloombergtvmongolia.com