АНУ-ын Нью-Йорк мужид “COVID-19”-ийн халдварын улмаас нас барсан хүний тоо зургаан өдөр дараалан буурлаа. Тоон үзүүлэлт шинэ төрлийн “коронавирус”-ийн тархалт тогтворжиж эхэлснийг илтгэж байна гэж тус мужийн захирагч мэдэгдсэн байна. Мөн Зүүн Өмнөд бүсийн Жоржиа, Өмнөд Каролин муж эдийн засгаа эргэн нээх арга хэмжээнүүд авчээ.

АНУ-ын халдварт өвчин судлалын тэргүүлэх мэргэжилтэн Энтони Фаучи хөл хориог эсэргүүцэн жагсаж буй хүмүүст хандаж “Эдийн засгаа хэт яарч нээх нь илүү их хор хөнөөл дагуулж магадгүй” гэж анхаарууллаа. Лос Анжелест явуулсан судалгаагаар шинэ төрлийн “коронавирус”-ийн тархалт өмнө нь тооцоолсноос илүү газар авч магадгүй байгаа юм байна.

Харин Герман улс хязгаарлалтын зарим арга хэмжээгээ сулрууллаа. Харин Их Британи ийм шийдвэр гаргах эсэхээ хүлээзнэж байна. Итали болон Их Британид халдвар болон нас баралтын шинэ тохиолдол аль аль нь буурчээ.

ОХУ-ын Ерөнхийлөгч Владимир Путин
“Бид шинэ төрлийн “коронавирус”-ийн халдварын эсрэг тэмцэж, эхний шатны зорилтуудаа биелүүлж чадсан. Тархалтын эрчийг сулруулж чадсан. Гэхдээ үүгээр бид тайвширч болохгүй. Эрдэмтэд халдвар оргил цэгтээ хараахан хүрээгүй байна гэж хэлж байна. Энэ үзүүлэлт оргил цэгтээ хүрсэн үед бид энэ байдлыг удаан үргэлжлүүлэхгүйн тулд бүгдийг хийх шаардлагатай. Халдвар оргил цэгтээ хараахан хүрээгүй байна” гэж мэдэгдлээ.

Дэлхийн хэмжээнд шинэ төрлийн “коронавирус”-ийн халдвар авсан 2.4 сая (2,480,740), нас барсан 170 мянган тохиолдол бүртгэгдээд байна. Харин эдгэрсэн хүний тоо 646 мянга байна.

Дэлхийн Эрүүл Мэндийн Байгууллагын мэдээлснээр “COVID-19” харьцангуй тогтвортой бүтэцтэй нь судалгаагаар тогтоогджээ. Энэ нь вакцин хөгжүүлэлтэд эерэг гэсэн үг аж. Хэрэв хэт их хувьсан өөрчлөгддөг вирус бол тэр хэрээрээ вакцины үр нөлөө бага байх юм байна.

ДЭМБ-ын тэргүүн Тедрос Адханом
“Бидэнд итгэ. Хамгийн хүнд цаг үе биднийг хүлээж байна. Ийм уй гашуу тохиолдохоос сэргийлье. Одоо ч гэсэн олон хүн энэ вирусийн талаар сайн мэдэхгүй байна. Хөгжингүй орнуудаас олноороо төдийлөн мэдэхгүй, хүнд байдалд орсноосоо болж буруу дүгнэлтүүд хийж байна. Шинэ төрлийн “коронавирус” хөгжингүй орнуудад хүртэл цохилт болно гэдгийг бид анхааруулсан. Дахин цохилтод орохгүй байцгаая. Нэг хүний амь ч үнэтэй байдаг байхад хүмүүс олон мянгаараа нас барж байна” гэж мэдэгдэв.

БНХАУ-ын Гадаад хэргийн яамны хэвлэлийн төлөөлөгч Гэн Шуан
“Бусад орнуудын адил БНХАУ ч шинэ төрлийн “коронавирус”-ийн халдлагад өртсөн, бас л нэг хохирогч. Бид буруутан биш, вирусийн хамсаатан ч биш. Эрүүл мэндийн хямрал, халдварт өвчний аюулын үед олон улс нэг нэгнээ буруутгаж, аль нэг талаараа хариуцлага хүлээлгэх эсвэл тэднээс нөхөн төлбөр шаардах гэж яарахын оронд нэгдмэл байдлаа хадгалах хэрэгтэй” гэсэн байна.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com