Дэлхийн хэмжээнд шинэ төрлийн “коронавирус”-ийн эсрэг вакцин хөгжүүлэлтийн 70 гаруй төсөл хэрэгжиж эхлээд байгааг Дэлхийн эрүүл мэндийн байгууллага мэдээллээ. Үүнээс гурвыг нь хүн дээр туршиж эхэлжээ.

БНХАУ-ын зүүн хойд бүсийн Харбин хот шинэ төрлийн “коронавирус”-ийн тархалтаас сэргийлж хорио цээрийн арга хэмжээгээ чангатгалаа. ОХУ-ын хилээр нэвтрэх аялагчдын хөл хориог 28 хоног хүртэл сунгахаар болсон байна. Ням гарагт БНХАУ-д халдварын 108 шинэ тохиолдол бүртгэгдсэн бөгөөд дийлэнх нь ОХУ-аас зөөвөрлөгдсөн тохиолдлууд байжээ.

ОХУ-д 15 мянга 770 хүн шинэ төрлийн “коронавирус”-ийн халдвар авсан нь тогтоогдоод байна. "Цаашид нөхцөл байдал хүндрэх магадлалтай" гэж Москва хотын захирагч анхааруулжээ.

Харин АНУ шинэ төрлийн “коронавирус”-ийн халдварын улмаас нас барсан хүнийхээ тоогоор хамгийн өндөр үзүүлэлттэй боллоо. Тус улсад халдвар авсан хүний тоо 560 мянга даваад байгаа бол эндэгдэл 22 мянга 115 хүрээд байна.

Харин Франц, Герман, Итали, Испанид халдварын шинэ тохиолдлын тоо буурчээ. Нас баралт 10 мянга давсан тав дахь орноор Их Британи нэрлэгдэж эхлэв. Өнөөдрийн байдлаар Их Британид 84 мянга гаруй хүн "COVID-19"-өөр өвчилсөн нь тогтоогдоод байна.

Дэлхийн хэмжээнд шинэ төрлийн “коронавирус”-ийн халдвар авсан 1.8 сая, нас барсан 114.2 мянган тохиолдол бүртгэгдээд байна. Харин эдгэрсэн хүний тоо 427.8 мянга боллоо.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com