Энэ оны эхний хагас жилд дэлхий дахинд тохиолдсон байгалийн гамшгууд олон улсын эдийн засагт 85 тэрбум ам.долларын хохирол учруулжээ. Энэ нь нэг жилийн өмнөхтэй харьцуулахад 10 тэрбум ам.доллараар нэмэгдсэн үзүүлэлт болж байгаа ч 10 жилийн дунджаасаа 15 хувиар буурсан дүнтэй гарсан тухай “Aon” корпорациас хийсэн судалгаанд онцолсон байна. Судалгаанд тусгаснаар, 2013 оны эхний хагас жилийн хамгийн их хохирол авчирсан байгалийн гамшиг нь Төв Европт нүүрлэсэн үер байсан аж. Хоёр сарын турш үргэлжилсэн Төв Европын үер болон шуурга дэлхийн эдийн засагт шууд утгаараа 22 тэрбум ам.доллар, даатгалын компаниудад 5.3 тэрбум ам.долларын хохирлыг тус тус авчирсан байна. Үүний дараагаар дөрөвдүгээр сард Хятадын 200 орчим иргэнийн аминд хүрсэн газар хөдлөлт оржээ. Тус газар хөдлөлтийн улмаас эдийн засагт нийт 14 тэрбум ам.долларын хохирол учирсан байна. Ийнхүү байгалийн гамшиг улам бүр газар авсаар байгаа нь даатгалын компаниудад ихээхэн хэмжээний хохирол учруулж байгааг компанийн төлөөллүүд онцолж байгаа юм. Тухайлбал, Нью Жерсид төвтэй “The Warren” компани АНУ болон Канадад болсон үерийн улмаас 156 сая ам.долларын хохирол хүлээснээр нэгж хувьцаанд ногдох хохирлын хэмжээ нь 60 цент болсон байна.

Б.Дуламхорлоо

Холбоо барих: Dulamkhorloo.b@bloombergtvmongolia.com

Munkhjin.ts@bloombergtvmongolia.com