АНУ-ын Нью-Йорк мужийн захирагч амны хаалт зүүхийг хатуу шаардаж эхэллээ. Шинэ төрлийн “коронавирус”-ийн тархалтын голомт болсон тус мужид халдварын тохиолдол 0.5 хувиар нэмэгдсэн нь тархалтын хурд тогтворжсоныг илтгэж байна.

Харин Нью-Жерси мужид нас баралт 3000 даваад байна. АНУ-д халдварын тохиолдол 3.5 хувиар буюу сүүлийн долоо хоногийн дунджаас хоёр дахин бага дүнгээр нэмэгдсэн байна. Эндсэн хүний тоо 2.3 мянгаар буюу 10 хувиар нэмэгдэж, 28.4 мянга хүрчээ.

Европын Комисс хязгаарлалтын арга хэмжээнүүдээ хэсэгчлэн цуцлах төлөвлөгөө танилцууллаа. Хэдий тийм боловч зарим арга хэмжээнүүдийг вакцин, эмчилгээ гарах хүртэл хэрэгжүүлсэн хэвээр байна гэж анхааруулжээ.

ХБНГУ-д халдварын шинэ тохиолдол сүүлийн зургаан өдөр дараалан буурсан байна. Тус улс хязгаарлалтын арга хэмжээгээ сунгахаар төлөвлөөд байгаа аж. Гэхдээ сургуулиудын хичээлийг тавдугаар сарын эхнээс шат дараатайгаар эхлүүлэхээр болсон байна.

ХБНГУ-ын Канцлер Ангела Меркель
“Бид богино хугацааны үр дүнд хүрсэн. Үүнд гэхдээ сэтгэл амарч болохгүй. Бид үргэлжлүүлэн сонор сэрэмжтэй байх хэрэгтэй. Тавдугаар сарын дөрвөнөөс сургуулиудын үйл ажиллагааг алгуур эргэн сэргээнэ. Гэхдээ бөөгнөрлөөс аль болох татгалзах шаардлагатай. Сургуулийн автобусыг зохион байгуулалттай ашиглаж, завсарлагааны үеэрх сонор сэрэмжийг нэмэгдүүлэх шаардлагатай” гэж мэдэгдсэн байна.

Италид мөн халдварын шинэ тохиолдол дөрвөн долоо хоногийн доод түвшинд хүрч буурчээ.

Францад нас баралт 1.4 мянга буюу өмнө байгаагүй ихээр нэмэгдэж, 17.1 мянга хүрсэн байна. Тус улсын эдийн засгийн өсөлт “COVID-19”-ийн нөлөөгөөр энэ онд найман хувиар буурах магадлалтай гэж Засгийн газар нь тооцоолжээ.

Канадын Ерөнхий сайд Жастин Трюдо
“Бид хязгаарлалтын арга хэмжээнүүдээ зөөлрүүлэх талаар судалж эхэлтэл дахиад хэдэн долоо хоног болно. Хэрэв бид арай түргэдэж хязгаарлалтуудаа султгавал “COVID-19”-ийн дахиад нэг давлагаа үүсэх аюултай. Тэгвэл өнөөдрийг хүртэл бидний хийсэн бүгд замхарна гэсэн үг. Харин шаардлагатай хугацаагаар нь тэсвэрлэж чадвал нөхцөл байдлыг хяналтдаа авч чадна” гэж онцоллоо.

Дэлхийн хэмжээнд шинэ төрлийн “коронавирус”-ийн халдвар авсан хоёр сая (2,083,032), нас барсан 134.6 мянган тохиолдол бүртгэгдээд байна. Харин эдгэрсэн хүний тоо 511 мянга болжээ.

ДЭМБ-ын онц байдлын хөтөлбөр хариуцсан тэргүүн Майк Райан
“Нэгдүгээр сарын эхээр Дэлхийн эрүүл мэндийн байгууллага маш тодорхой мэдэгдсэн. Нэгдүгээр сарын таванд дэлхийн хэмжээнд сэрэмжлүүлсэн. АНУ тэргүүтэй орнууд бэлэн байдлаа хангаж эхэлсэн. Үүний дараа Засгийн газрууд, эрдэмтэн судлаачдад нөхцөл байдлын талаар удаа дараалан мэдээлэл хийсэн. Шинэ төрлийн “коронавирус”-ийг анх нэгдүгээр сарын долоонд илрүүлж тогтоосон. Холбогдох мэдээллийг тухайн сарын дөрвөн болон 12-нд өгсөн” гэж мэдэгдэв.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com