ОХУ-д “COVID-19”-ийн халдвар авсан хүний тоо найм дахь өдрөө 10 мянга гаруйгаар нэмэгдэж, 209 мянга давлаа. Энэ нь эдийн засгаа эргэн нээх төлөвлөгөөнд асуудал үүсгэж байна. Тус улсад тархалт оргил цэгтээ хүрч байгаа гэж Дэлхийн Эрүүл Мэндийн Байгууллага таамаглажээ.

Энэтхэгт халдварын тохиолдол 4.3 мянгаар, Сингапурт 800 гаруйгаар нэмэгдсэн байна.

БНХАУ-д 14 тохиолдол нэмж бүртгэгдлээ. Үүний дараа БНАСАУ-тай хиллэдэг Жилин мужийн Шулань хотод хөл хорио тогтоосон байна.

БНСУ-д 30 гаруй тохиолдол нэмж бүртгэгдсэн нь сүүлийн нэг сарын анхны тохиолдол боллоо. Халдвар шөнийн цэнгээний газар, диско баруудад тархсан тул энэ төрлийн үйлчилгээ явуулдаг 2000 гаруй газрыг хаах шийдвэрийг Сөүлийн захирагч танилцуулсан байна.

АНУ-д халдварын тохиолдол 19 мянгаар буюу 1.8 хувиар нэмэгдэж, 1.3 сая давлаа. Энэ нь сүүлийн нэг долоо хоногийн дунджаас арай бага үзүүлэлт болж байна.

Хэвлэлийн төлөөлөгч шинэ төрлийн “коронавирус”-ийн халдвар авсан нь тогтоогдсоны дараа АНУ-ын дэд Ерөнхийлөгч Майк Пенс тусгаарлалтад орсон байна. Мөн Энтони Фаучи тэргүүтэй Цагаан ордны тусгай багийн гурван гишүүныг тусгаарлажээ.

Дональд Трамп, Мун Жэ Ин нар утсаар холбогдсоны дараа БНСУ АНУ руу хоёр сая ширхэг амны хаалт илгээсэн байна.

Франц, Италид нас баралт гуравдугаар сараас хойших доод түвшиндээ хүрлээ. Харин Бразилд эндсэн хүний тоо 24 цагт 1.1 мянгаар буюу өмнө байгаагүй ихээр өсжээ.

Эм үйлдвэрлэгч “Johnson & Johnson” компани “COVID-19”-ийн эсрэг вакцины клиникийн туршилтыг есдүгээр сард эхлүүлэхээр болжээ. 2021 он гэхэд нэг тэрбум вакцин үйлдвэрлэхээр төлөвлөж байгаагаа мэдэгдсэн байна.

Дэлхийн хэмжээнд шинэ төрлийн “коронавирус”-ийн халдвар авсан 4.1 сая (4,179,720), эндсэн 283 мянга гаруй тохиолдол бүртгэгдээд байна. Харин эдгэрсэн хүний тоо 1.4 сая боллоо.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com