Дэлхийн ихэнх улс оронд цар тахлын хязгаарлалтуудыг цуцалж эхэлж байгаа нь 2022 онд аялал, жуулчлалын салбар эрчимтэй сэргэнэ гэсэн хүлээлт бий болоод байна.

Тухайлбал: Их Британи болон Франц улс вакцины бүрэн тунд хамрагдсан зорчигчдыг хилээр нэвтрэхэд шинжилгээ авах шаардлагыг цуцалжээ.

Европын аялал, жуулчлалын томоохон компанийн нэг “Tui” Их Британи дахь салбар нислэг болон зочид буудлын багцын захиалга цар тахлын өмнөх буюу 2019 онтой дөхөж ирээд байгааг мэдээллээ.

Түүнчлэн Их Британийн “Eurostar International” Лондон-Парис хоорондын галт тэрэгний тасалбар зарагдаж дууссан байна. Зорчигчдын тоо өнгөрсөн зуны үзүүлэлттэй харьцуулахад хоёр дахин нэмэгджээ. Мөн ирэх сар гэхэд Евро бүсэд хийх нийт нислэгийн тоо цар тахлын өмнөх үеийн үзүүлэлтийн 75 хувьд хүрэхээр байгааг “Cirium” судалгааны байгууллага мэдээлэв.

Харин Тайланд улс вакцинд хамрагдсан иргэдийг тусгаарлалтгүйгээр хилээрээ нэвтрүүлж байна. Тус улс энэ онд 10 орчим сая жуулчин хүлээн авна гэж тооцоолоод байгаа аж. Энэ нь цар тахлын өмнөх үеэс дөрөв дахин бага дүн юм. Тайланд улсын хувьд одоогоор хилээр нэвтэрч буй иргэдээс шинжилгээ авсан хэвээр байна. Цаашид Зүүн Өмнөд Азийн орнууд гаднын аялагчдаас түргэвчилсэн шинжилгээ авахаа болих хэрэгтэй гэж Малайзын Аялал, жуулчлалын зөвлөгөөний байгууллага мэдээллээ.

Япон улсын хувьд хилээр нэвтрүүлэх гадаадын иргэдийн дээд хязгаарыг 5000 болгон нэмэгдүүлэх талаар хэлэлцэж байна. Үүнд гадаад ажилтнууд болон оюутнууд хамрагдах ажээ. Харин жуулчдад хамаарахгүй юм байна.

М.Аминаа

Холбоо барих: aminaa.m@bloombergtvmongolia.com

minjma.g@bloombergtvmongolia.com