“COVID 19” цар тахал "Дэлхий даяарх эрүүл мэндийн системийн сул талыг ил болголоо" гэдгийг “Их 20”-ийн Эрүүл мэндийн сайд нар санал нэгтэй хүлээн зөвшөөрлөө.

Ням гарагт Дэлхийн Эрүүл Мэндийн Байгууллага болон хамгийн чинээлэг орнуудын Эрүүл мэндийн сайд нар, томоохон эмнэлгийн төлөөллүүд оролцсон хурлын үеэр Дэлхийн Эрүүл Мэндийн Байгууллагын тэргүүн Тедрос Адханом "Зарим улсад хөл хорионы арга хэмжээг сулруулсан нь цар тахал дарагдсан гэсэн үг биш" гэж байсан юм.

Үүнээс гадна цар тахал дэлхийн дийлэнх оронд тархсанд АНУ-ын Ерөнхийлөгч Дональд Трамп Дэлхийн Эрүүл Мэндийн Байгууллага болон БНХАУ-ын эрх баригчдыг буруутгаж байна. Тэрээр БНХАУ “COVID-19”-ийн цар тахлыг санаатайгаар тараасан байж болзошгүй гэж сэжиглэж байгаагаа илэрхийлсэн юм. Дональд Трамп "Хэрэв мэдсээр байж хариуцлагагүй үйлдэл хийсэн бол тохирох арга хэмжээ авна" гэж хэллээ.

Үүнээс өмнө АНУ-ын дэд Ерөнхийлөгч Майк Пенс " Дэлхийн Эрүүл Мэндийн Байгууллага БНХАУ-ын дотоод нөхцөл байдлыг дэлхий нийтэд бодитоор тайлагнаагүй нь илт. Хэдий тийм боловч БНХАУ ч бас мэдээллээ хэт нуусан нь тодорхой" гэж байв. Энэ шалтгаанаар Дэлхийн Эрүүл Мэндийн Байгууллагад олгодог санхүүжилтээ АНУ түр зогсоогоод байна.

Харин БНХАУ-ын Гадаад хэргийн яамны төлөөлөгч "АНУ болон бусад орнууд хариуцлага алдсаныхаа бурууг бусдад тохох оролдлогоо зогсоох хэрэгтэй" гэж хариу мэдэгджээ.

Б.Дашням | @Dashnyam_tsahir

Холбоо барих: dashnyam.b@bloombergtvmongolia.com

minjma.g@bloombergtvmongolia.com